Ultra-marafonchi Din Karnasis O‘zbekistondan yugurib o‘tadi

29-iyundan 10-iyulga qadar afsonaviy ultra-marafonchi Din Karnasis Buyuk Ipak yo‘li bo‘ylab O‘zbekiston, Qirg‘iziston va Qozog‘iston hududidan yugurib o‘tadi. AQSh Davlat departamenti tashkil etgan tadbir uch mamlakat mustaqilligining 25 yilligiga bag‘ishlanadi, deb xabar bermoqda “Gazeta.uz”.

Foto: Din Karnasisning rasmiy sayti

AQShning O‘zbekistondagi elchixonasi bergan axborotga ko‘ra, Din Karnasis “Sport elchisi” (Sports Envoy) dasturi doirasida 11 kun davomida 525 kilometr masofani yugurib o‘tib, Bishkekdan Toshkentga, u yerdan esa Olmaotaga boradi.
Kuniga o‘rtacha 80 kilometrdan yugurishi ko‘zlangan Karnasis AQSh vakili sifatida aloqalar o‘rnatadi, yugurish bo‘yicha qisqa mashg‘ulotlar o‘tkazadi, chiqishlar qiladi hamda turli yoshdagi insonlarni yugurishga qo‘shilishga chaqiradi.
“Insonlarni, madaniyatlarni va tarixni bog‘lar ekan, Dinning Markaziy Osiyo bo‘ylab sayohati sport diplomatiyasining turli madaniyat va millat vakillarini birlashtirish qudratini namoyish etish imkoniyatini beradi”, — deyiladi elchixona xabarnomasida.
Din Karnasis Time jurnali tomonidan dunyodagi eng e’tiborli insonlar yuzligiga kiritilgan. U 563 kilometr masofani uch kecha-kunduz davomida uxlamay bosib o‘tgani bilan mashhur. Bundan tashqari, yaqinda u ketma-ket 50 kun davomida AQShning barcha 50 shtati bo‘ylab marafonlar uyushtirdi.
Batafsil | Подробно | Read more... Daryo