Eronlik kinotanqidchilar Di Kaprio Rumiy rolini ijro etishidan norozi

Amerikalik aktyor Leonardo Di Kaprio buyuk shoir va mutafakkir Jaloliddin Rumiy rolini ijro etishi haqidagi yangilik Eron kino muxlislari va tanqidchilarini g‘azablantirdi. Bu haqda Al-Monitor xabar bermoqda .

Foto: Al-Monitor

“G‘arb prodyuserlari Sharq mistitsizmini yaxshi tushunadimi? Ular ‘Masnaviy’ning mag‘zini chaqa oladimi? Umuman, ular tushunish darajasiga yeta oladimi? Afsuski, javob salbiydir”, — dedi eronlik kinotanqidchi Rizo Siddiq.
Twitter foydalanuvchilari Di Kaprioning bu rolga tanlanishi munosabati bilan o‘z noroziliklarini # RumiWasntWhite (“Rumiy oq bo‘lmagan”) heshtegi orqali bildirmoqda. Shuningdek, ular Rumiyning ustozi — Shams Tabriziy obrazini Kichik Robert Dauni gavdalantirayotganidan ham norozi.
“Sharq odamlarini terrorchilar roliga taklif etishga ular doimo shay. Lekin nega oq inson Rumiydan afsonaviy shaxs rolini ijro etmoqda?”, — deydi foydalanuvchi Ilva’d Issa.
“Rostini aytsam, Gollivud etnik qahramonlarni ‘oqlash’ bilan shug‘ullanayotganidan charchadim. Leo Rumiy vakili bo‘lgan odamlarning vakili emas”, — fikr bildirdi yana bir foydalanuvchi Dalia.
Rumiy rolini oq tanli aktyor ijro etishiga qarshi onlayn petitsiya shu paytga qadar 14 ming imzo to‘pladi.
Ushbu qoralash kampaniyasining tanqidchilari ham bor.
“# RumiWasntWhite — internetda sodir bo‘lgan eng ahmoqona narsa”, — dedi foydalanuvchilardan biri Saif.
Rumiy haqidagi film syomkalari qachon boshlanishi ma’lum emas. Ssenariy ustida “Gladiator” va “Amistad” kartinalari muallifi Devid Fransoni ishlamoqda. Film Gollivud va Turkiyaning qo‘shma loyihasidir.
Batafsil | Подробно | Read more... Daryo