OAV: Fransiyada mahbus qamoqxona ruhshunosini garovga oldi

Fransiyaning sharqiy qismida joylashgan Ensisxaym shahridagi qamoqxona mahbusi ushbu muassasaning ruhshunosini garovga oldi. Bu haqda mahalliy OAVlarga tayanib, “TASS” xabar bermoqda .

Foto: France24

“Ayni damda men ruhshunosni uning bo‘yniga pichoq tirab turgan holda garovda ushlab o‘tiribman. Bu qilmishim uchun jazo muddati qo‘shilishini bilaman, ammo mening ishim haqida OAV bilishini istayman”, – deya ma’lum qildi mahbus mahalliy Dernières Nouvelles d’Alsace nashri jurnalistlariga.
Nashrning qayd etishicha, mazkur voqea sababchisi 27 yoshli Mikael Gilgenmann. U o‘z xatti-harakatlarini “qamoqxona ma’muriyatining munosabatiga qarshi norozilik” deya izohladi.
Mahbusning aytishicha, qamoqxona soqchilari shu yilning may oyida vafot etgan otasi bilan munosib tarzda xayrlashishga imkon bermagan. “Otam bilan xayrlashish uchun o‘likxonada ikki soat bo‘lishimga ruxsat berilgandi, lekin u yerda atigi 20 daqiqa bo‘ldim. Qo‘shimchasiga, uning tobutiga yaqinlashtirishmadi. Men hech qanday muammo keltirib chiqarmagan bo‘lsam-da, jandarmlar u yerdan ketishga majburladi”, – dedi Mikael Gilgenmann.
Qayd etish joizki, 27 yoshli mahbus o‘g‘riliklar uchun muqaddam sudlangan. U Fransiya sharqidagi qamoqxonalarda ikki marta garovga olishni amalga oshirmoqchi bo‘lgan. Hozirgi vaqtda jandarmlar voqea joyida bo‘lib turibdi.
Batafsil | Подробно | Read more... Daryo