Rayan Giggzning “Manchester Yunayted”dagi eng buyuk 11 lahzasi

Kecha, 2-iyul kuni “Manchester Yunayted” klub afsonasi Rayan Giggzning ketayotganini e’lon qildi. Giggz futbolchi va murabbiy sifatida jamoaga 29 yilini baxshida qildi.
U 14 yoshida klub akademiyasiga kelib, futbolchilik faoliyatini boshlagandi. So‘nggi uch yilda esa jamoa bosh murabbiyi bo‘lib ishlagan Devid Moyes va Lui van Galga assistentlik qildi.
“Korrespondent.net” nashri Rayan Giggzning “Manchester Yunayted”dagi eng buyuk 11 lahzasini yodga oldi .
1. Debyut

Foto: The Independent

“Manchester Yunayted”ning bir qator yoshlar jamoasida 3 yil to‘p surgan uelslik futbolchi 17 yoshida, 1991-yilning 2-martida “Everton”ga qarshi o‘yinda asosiy jamoada debyutini o‘tkazdi.
2. “1992-yil avlodi”

Foto: Daily Mail

1992-yilda Rayan Giggz “MYu”ning yoshlar jamoasi sardori bo‘ldi va Angliya yoshlar Kubogini qo‘lga kiritdi. O‘sha jamoa tarkibida Pol Skoulz, Niki Batt, Devid Bekxem, Fil va Gari Nevillar bor edi. Ularning barchasi asosiy jamoa tarkibi afsonasiga aylandi, Giggz esa ularning yetakchisi bo‘ldi.



3. 1992-yili “Tottenhem” darvozasiga kiritilgan gol



1991/92-yilgi mavsumning so‘nggi o‘yinlarida Giggz zaxiradan maydonga tushar edi. Kelasi mavsumdan esa u asosiy tarkib futbolchisi bo‘ldi. Rayan asosiy jamoadagi debyut mavsumida “Tottenhem” darvozasiga o‘zining eng chiroyli gollaridan birini kiritdi.
4. Premyer-ligadagi ustunlik

Foto: Daily Mail

1993/94-yilgi mavsumda Giggz Premyer-liga doirasida 13 ta gol kiritgan edi. Bu uning shaxsiy rekordi sanaladi. Bundan tashqari, u o‘sha mavsumda o‘zining birinchi dublini (Angliya chempionligi va Kubogi) qayd etdi.
5. Ikkinchi dubl

Foto: Sky Sports

1995/96-yilgi mavsumda Giggz “1992-yil avlodi” bilan to‘rt yil ichida uchinchi chempionligini, shuningdek, Angliya Kubogini qo‘lga kiritdi.
6. 1997/98-yilgi mavsumda YeChLda “Yuventus” ustidan erishilgan g‘alaba

Foto: The Telegraph

1997-yilning guruh bosqichida “MYu” “Yuventus” bilan to‘qnash keldi. Giggz golli uzatmasi va 89-daqiqada kiritgan goli bilan mankunianlarning 3:2 hisobidagi g‘alabasiga hissa qo‘shdi. Bir yil avval “Yuventus” “Manchester Yunayted”ni guruh bosqichida ikki marta mag‘lub qilgandi.
7. 1999-yilgi Angliya Kubogi yarim finalidagi gol



1999-yilgi Angliya Kubogining yarim finalida “Arsenal” darvozasiga kiritilgan golni Giggz eng yaxshilaridan biri deb biladi.
8. Yangilangan rekord

Foto: Daily Mail

“Manchester Yunayted”da faoliyatini boshlaganidan 17 yil o‘tib, Giggz “MYu” safida o‘tkazilgan o‘yinlar bo‘yicha klub afsonalaridan biri ser Bobbi Charltonning (758 o‘yin) rekordini yangiladi. Bu hodisa “Uigan”ga qarshi o‘yinda sodir bo‘ldi. Giggz o‘shanda bitta gol urib, 10-bor APL chempionligiga erishgandi.
9. Angliya Premyer-ligasining eng yaxshi faxriysi



Giggz 35 yoshida ham ajoyib futbol namoyish etardi. Faoliyatining so‘nggiga qadar u har bir mavsumda kamida 30 o‘yinda maydonga tushardi.
10. 13-baxtli chempionlik

Foto: The Guardian

“Manchester Yunayted”ning birinchi chempionligidan 20 yil o‘tib, 2013-yilda Giggz jamoa bilan 13-marta APL chempioni bo‘ldi. Uning rekordini yangilashning imkoni bo‘lmasa kerak.
11. Bosh murabbiy

Foto: Daily Mail

Giggz 2013/14-yilgi mavsumni o‘ynaydigan murabbiy sifatida boshladi. Mavsum yakunida Devid Moyes iste’foga chiqarilgach, Giggz bir nechta o‘yinlarda bosh murabbiy vazifasi bajaruvchi bo‘lib ishladi.
Batafsil | Подробно | Read more... Daryo