Erdo‘g‘on suriyalik qochqinlarga Turkiya fuqaroligini berish niyatini bildirdi

Suriyadagi fuqarolik urushidan qochib Turkiyaga o‘tgan qochqinlar mamlakat fuqaroligini olishi mumkin. Bu haqda aholisi muhojirlar hisobiga ikki barobar ortgan Kilis shahridagi chiqishi chog‘ida prezident Rajab Toyyib Erdo‘g‘on ma’lum qildi, deb  xabar beradi “RBK”.

Foto: Reuters

“Bu yerda bo‘lib turgan birodarlar va singillarimiz orasida Turkiya fuqaroligini olish istagidagilar bor. Ichki ishlar vazirligi bu borada tegishli ishlarni amalga oshirmoqda. Turkiya — sizning ham uyingiz”, — ta’kidladi Erdo‘g‘on.
Yuqori martabali turk mansabdorlaridan biri prezidentning so‘zlariga “niyatlar haqidagi bayonot” deb izoh berdi.
Erdo‘g‘on Suriyadagi vaziyatni tanqid ostiga oldi. Uning aytishicha, “siyosati 600 ming kishining o‘limiga olib kelgan shaxsni rahbar sifatida tasavvur etib bo‘lmaydi. Mavjud tuzum mamlakatni boshqarish layoqatini yo‘qotdi, Suriya xalqi esa qarorlarni qabul qilishga ta’sir etish imkoniyatiga ega emas”.
Turkiyada ayni paytda 2,7 million qochqin istiqomat qilayotgani qayd etilgan. Shuningdek, yuz minglab noqonuniy yashayotgan va ishlayotgan muhojirlar ham bor. Muxolifatga ko‘ra, Erdo‘g‘onning qarori hukmron partiyaga 3 milliongacha yangi ovozlarni olib kelishi va 2019-yilgi saylovlar natijasini o‘zgartirib yuborishi mumkin.
Batafsil | Подробно | Read more... Daryo