Toshkentda Intellect2All hududiy saralash bosqichi yakunlandi

28—30-iyun kunlari Yoshlar ijod saroyida Intellect2All axborot texnologiyalari loyihalari respublika tanlovining hududiy saralash bosqichi bo‘lib o‘tdi. Unda Toshkent shahri va Toshkent viloyatidan ishtirokchilar qatnashdi. Bu haqda Yoshlar tashabbuslari markazi matbuot xizmati “Daryo”ga xabar berdi.

Foto: Yoshlar tashabbuslari markazi matbuot xizmati

Uch kun davomida poytaxtlik yosh developerlar real vaqt rejimida loyihalarning prototiplari ustida ishladi va finalga chiqish uchun kurashdi. Toshkentdagi saralash bosqichi doirasida veb-ishlanmalar, mobil dasturlar va virtual reallik dasturlari sohasida 42 ta axborot texnologiyalar loyihasi namoyish etildi.
Veb-dasturlar yo‘nalishi bo‘yicha Tas-ix’dagi FreeChat milliy video-chati, “Sayyoh.uz” sayyohlik sayti, Uclass, I love to learn, Language School va “Social.uz” kabi ta’lim saytlari, Toshkent kollejlari onlayn katalogi TashCollege, “Hotprice.uz” va XCloud kabi axborot texnologiyalar loyihalari taqdim etildi.
Mobil ishlanmalar yo‘nalishida ishtirokchilar Scaner, “Svidetel.uz”, Echo, 3D Book, Gourman kabi mobil dasturlarni namoyish etdi.
Virtual reallik dasturlari bo‘yicha 360 Uzbekistan, Travelling, shuningdek, O‘zbekiston mustaqilligining 25 yilligiga bag‘ishlangan Gallery — virtual reallikdagi milliy muzey loyihalari taqdim etildi.
Eslatib o‘tamiz, saralash bosqichlari natijalari bo‘yicha eng yaxshi loyihalar finalga yo‘llanma oladi. Tanlov finali ICTWEEK Uzbekistan-2016 haftaligi doirasida bo‘lib o‘tadi. Tanlov yutuq jamg‘armasi 30 million so‘mni tashkil etadi.
Batafsil | Подробно | Read more... Daryo