Yo‘lning ikkinchi harakatlanish bo‘lagida qoldirilgan Captiva-inkassator bahs-munozaralarga sabab bo‘ldi

Toshkentda yo‘lning ikkinchi harakatlanish bo‘lagida to‘xtab turgan inkassatsiya xizmatiga tegishli Captiva avtomobili Facebook’dagi “Voditeli Tashkenta” guruhida bahs-munozaralarga sabab bo‘ldi .

Foto: Facebook / “Voditeli Tashkenta”

“Mana ular qanday to‘xtab turishadi. Ikkinchi harakatlanish bo‘lagida”, — deb fotoxabar qoldirgan foydalanuvchining qayd etishicha, inkassatsiya xizmati avtomobili shu turishi bilan harakatning boshqa ishtirokchilariga, xususan, surat muallifiga ham xalal bergan.
Surat ostida foydalanuvchilar qizg‘in munozaraga kirishgan. Guruhning ba’zi a’zolari inkassatsiya xizmatiga tegishli avtomobillar Yo‘l harakati qoidalarini muntazam ravishda buzishidan noligan bo‘lsa, boshqa bir guruh foydalanuvchilar inkassatorlarga bunday harakatlar uchun ruxsat berilganini ta’kidlagan.
“Ular atigi bir necha o‘n soniyaga to‘xtab turadi, xolos. Bir joyda uzoq ushlanib qolmaydi, shunday ekan, ularga mumkin”, — deb yozgan foydalanuvchilardan biri. Boshqasi esa, kinoya bilan: “Captiva bo‘lganidan keyin, mumkin bo‘ladi-da!”, — deb fikr qoldirgan.
Ma’lumot uchun, Yo‘l harakati qoidalarining 88-bandiga ko‘ra , transport vositalariga yo‘lning o‘ng tomoni yoqasida, u bo‘lmaganda esa qatnov qismining chetida to‘xtash va to‘xtab turishga ruxsat etiladi. Ma’muriy javobgarlik to‘g‘risidagi kodeksning 128-6-moddasi 1-qismiga muvofiq , haydovchilarning to‘xtash yoki to‘xtab turish qoidalarini buzishi eng kam ish haqining uch baravari (8 iyul holatiga ko‘ra — 390 720 so‘m) miqdorida jarima solinishiga sabab bo‘ladi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo