Masjiddagi o‘g‘rilik: Tahoratxonadan kuzatuv kamerasini yulib ketgan yigitga masjidga qaytib borish tavsiya qilindi

O‘zbekistondagi masjidlardan birining tahoratxonasidan kuzatuv kamerasi o‘g‘irlab ketildi. Facebook’dagi “Voditeli Tashkenta (Drivers.uz)” guruhida qoldirilgan videoxabarga ko‘ra , hodisa 1-iyul kuni yuz bergan.

Voqea aynan qaysi masjidda yuz berganiga aniqlik kiritilmagan. Videoda bir yigit tahoratxonaga kirib kelgani, so‘ng kamera o‘ng tomonga surila boshlanganini ko‘rish mumkin. Tomoshabin oxir-oqibat kamera joyidan sug‘urib olinayotganini tushunib yetadi va jarayon davomida tahoratxonaga kirib kelgan o‘sha yigitning siymosi ko‘rinadi.
“Voditeli Tashkenta (Drivers.uz)” guruhi a’zolari mazkur holatni keskin qoralagan, ba’zi foydalanuvchilar unga insof tilagan. “Bir yaxshi oilaning farzandiga o‘xshaysan, lekin qilgan ishing nafaqat senga, balki ota-onangga ham isnod. Aqlu hushingni yig‘ib, olgan narsangni masjidga olib borib ber va kechirim so‘ra”, — deb foydalanuvchilardan biri videodagi gumonlanuvchiga murojaat qilgan.
Bir qator foydalanuvchilar masjidlarda o‘g‘rilik holatlari uchrayotganini afsus bilan tilga olgan. “O‘tgan yili odamlar tahorat olayotganda bir kishi ularning cho‘ntagidagi narsalarni yig‘ishtirib ketayotgani tasvirlangan video tarqalgan edi. Tanishimning telefonini ham shunday qilib o‘g‘irlab ketishgan”, — deb yozgan guruh a’zolaridan biri.
“O‘tgan yili Ko‘kcha masjidida namoz vaqti xonaning oxirida turgan telefon, fotokamera va pul to‘la hamyonni o‘g‘irlab ketilgan edi… Bunday kishilarni o‘g‘ri deb e’lon qilishdan osoni yo‘q, lekin bundan jamiyatga foyda yo‘q. Aksincha, ularni to‘g‘ri yo‘lga chaqirish kerak, shunda, balki, o‘g‘rilar soni bittaga kamayar”, — deb fikr bildirgan foydalanuvchilardan biri.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo