AQShda ijtimoiy tarmoqlarda oq tanli politsiyachilarni o‘ldirishga chaqiriqlar tufayli 4 kishi hibsga olindi

Detroytning (Minnesota shtati) to‘rt nafar qora tanli fuqarosi ijtimoiy tarmoqlar orqali oq tanli politsiyachilarni o‘ldirishga chaqirgani uchun hibsga olindi. Bu haqda, shahar politsiya boshqarmasi boshlig‘i Jeyms Kreygning so‘zlariga tayanib, “TASS” xabar bermoqda .

Foto: AP Photo

“Kimdir prezidentni o‘ldirish bilan tahdid qilsa, u qo‘lga olinadi va sudlanadi. Nega, politsiyachilarning hayotiga tahdid qilinsa, shunday choralar ko‘rilmasligi kerak?” — deb bu xatti-harakatlarni tushuntirdi Kreyg.
Uning so‘zlariga qaraganda, qo‘lga olinganlardan biri Facebook tarmog‘i orqali bir necha marotaba quyidagi mazmunda chaqiriq tarqatgan: “Qora tanlilarning hayoti ahamiyatga ega bo‘lmas ekan, bu dunyoda hech narsa ahamiyatga ega bo‘lmaydi. Oq tanli politsiyachilarni o‘ldiring”.
Oxirgi kunlarda AQShda politsiyaning qora tanlilarga nisbatan zo‘ravonligiga qarshi ommaviy norozilik namoyishlari bo‘lib o‘tdi. 5-iyul kuni Baton-Ruj shahrida (Luiziana shtati) 37 yoshli afroamerikalik Elton Sterlingning, 6-iyul kuni Folkon-Xayts shahrida (Minnesota shtati) 32 yoshli qora tanli Filando Kastilening politsiyachilar tomonidan o‘ldirilishi bunga sabab bo‘ldi. Dallas shahridagi (Texas shtati) norozilik namoyishlari chog‘ida yuzaga kelgan otishmada besh nafar politsiyachi o‘ldirildi , yetti politsiyachi va ikki tinch fuqaro yaralandi. Snayper — 25 yoshli Mika Xaver Jonson politsiya tomonidan maxsus portlovchi uskuna yordamida yo‘q qilindi.
8-iyul, juma kuni AQShda dallaslik besh politsiyachi o‘ldirilishi munosabati bilan motam e’lon qilindi .
Batafsil | Подробно | Read more... Daryo