Davlat bojxona qo‘mitasi tomonidan sayg‘oq shoxlari kontrabandasi fosh etildi

O‘zbekistonda sayg‘oqlarni asrash, ular yashab, ko‘payadigan hududlarni muhofaza qilishga alohida e’tibor berilayotganiga qaramasdan, qonunga xilof tarzda ovlangan sayg‘oqlarning shoxlarini yashirin ravishda olib chiqishga bo‘lgan urinishlar ko‘zga tashlanmoqda. Yaqinda Farg‘ona viloyati bojxona boshqarmasi va Milliy xavfsizlik xizmati xodimlari bilan hamkorlikda o‘tkazilgan tezkor tadbir davomida yirik miqdordagi sayg‘oq shoxlarining kontrabandasi fosh qilindi. Bu haqda Farg‘ona viloyati bojxona boshqarmasi axborot xizmati “Daryo”ga ma’lum qildi.

Foto: Farg‘ona viloyati bojxona boshqarmasi axborot xizmati

Farg‘ona shahridagi omborlardan biri amaldagi tartiblarga muvofiq xolislar ishtirokida ko‘zdan kechirilganda, ushbu omborda 468 dona sayg‘oq shoxi hamda 72 dona mazkur turdagi shox bo‘lagi, bundan tashqari 170 dona teri yashirin ravishda saqlanayotganligi fosh qilindi.
Surishtiruvlar davomida aniqlanishicha, noqonuniy ravishda olib chiqishga mo‘ljallangan ushbu noyob mahsulotlar va terilar So‘x tumanida istiqomat qiluvchi Farhod Amurovga (ism-sharifi o‘zgartirilgan) tegishli bo‘lib, dastlabki ma’lumotlarga ko‘ra, ularning narxi salkam 148 million so‘mni tashkil qiladi.
Hozirda mazkur holat yuzasidan bojxona tekshiruvlari va surishtiruv jarayonlari davom ettirilmoqda.
Sayg‘oq milliy va xalqaro “Qizil kitob”ga kiritilgan bo‘lib, uni ovlash 1992-yildan boshlab qat’iyan man qilingan.
Batafsil | Подробно | Read more... Daryo