Jaguar Land Rover 100 ta o‘zini boshqaruvchi avtomobilni sinovdan o‘tkazishni rejalashtirmoqda

Jaguar Land Rover (Buyuk Britaniya) yaqin to‘rt yil mobaynida 100 ta o‘zini boshqaruvchi avtomobil ishlab chiqarish va mamlakat yo‘llarida sinab ko‘rishni rejalashtirmoqda. Bu haqda The Guardian manbalariga tayanib, “Interfaks” xabar bermoqda . 

Foto: The Guardian

Sinovlar kompaniyaning Koventri grafligi, Uitni shahrida joylashgan shtab-kvartirasi yaqinidagi 66 kilometr uzunlikda bo‘lgan, shaharlararo shosse va shahar yo‘llarini o‘z ichiga olgan hududda o‘tkaziladi. Zarur uskuna va qurilmalar bilan jihozlangan birinchi avtomobil Koventrida shu yil paydo bo‘lishi kutilmoqda.
Sinov chog‘ida kompaniya nafaqat bort kompyuteri real vaqt tartibida atrofdagi obyektlar haqida ma’lumot olishiga imkon beruvchi 3D-qurilma, balki boshqa avtomobillar bilan ma’lumot almashishga qodir datchiklarni ham tekshirib ko‘radi. Bunday ma’lumotlar mashinalarga yo‘llardagi tiqilinchlarda yaxshiroq mo‘ljal olish va to‘qnashuvlardan o‘zini olib qochishga yordam beradi. 
Buyuk Britaniya hukumati dunyo miqyosidagi avtonom avtomobillar bozori potensialini 900 milliard funt sterling (1,2 trillion dollar)ga baholamoqda. Rasmiylar 2020-yilga kelib mamlakat yo‘llarida haydovchisiz mashinalar harakatlanishiga imkon beradigan qonun-qoidalarni ishlab chiqishni mo‘ljallamoqda. 
Batafsil | Подробно | Read more... Daryo