Bojxona boshqarmasi xodimlari bolalar o‘yinchoqlarini yashirin olib kirish holatlarining oldini oldi

O‘zbekistonga olib kirilayotgan bolalar o‘yinchoqlari va o‘yinlar majburiy tartibda sertifikatlanadigan tovarlar turiga kiradi. Yaqinda poytaxt bojxona xodimlari tomonidan shu turdagi bir nechta bojxona qoidabuzarliklari fosh qilindi. Bu haqda Toshkent shahar bojxona boshqarmasi axborot xizmati “Daryo”ga ma’lum qildi.

Foto: Toshkent shahar bojxona boshqarmasi axborot xizmati

Jumladan, Toshkent shahar bojxona boshqarmasining “Toshkent-tovar” tashqi iqtisodiy faoliyat bojxona posti xodimlari tomonidan Toshkentda faoliyat yuritayotgan korxonalardan birining nomiga xorijdan temir yo‘l konteynerida keltirilgan yuklar o‘rnatilgan tartibda bojxona ko‘rigidan o‘tkazilganda, mazkur tovarlarga tegishli bojxona yuk deklaratsiyasi va yo‘l-yuk kuzatuv hujjatlarida qayd qilinmagan, qiymati salkam 4,5 million so‘mlik 6 turdagi 504 dona bolalar o‘yinchog‘i yashirin ravishda olib kirishga uringanligi aniqlandi.
Mazkur postda aniqlangan shunga o‘xshash yana bir holatda esa, yakka tartibdagi tadbirkor nomiga xorijdan keltirilgan yuklar bojxona ko‘rigidan o‘tkazilganda, unda bojxona yuk deklaratsiyasi va boshqa hujjatlarda qayd qilingan miqdoridan ortiqcha bo‘lgan 37,1 million so‘mlik 3 903 dona bolalar o‘yinchog‘i olib kirilgani fosh bo‘ldi.
Hozirda mazkur holatlar yuzasidan bojxona surishtiruvlari va tekshiruv jarayonlari davom ettirilmoqda.
Batafsil | Подробно | Read more... Daryo