Tesla AQShda uchinchi avtomobili halokatga uchraganiga izoh berdi

AQShda oxirgi paytlarda avtoboshqaruvli Tesla mashinalari bilan bog‘liq uchinchi yo‘l-transport hodisasi qayd etildi. Bu haqda “Interfaks” xabar bermoqda . 

Foto: Motor

May oyi boshida Joshua Braun Floridada Tesla Model S bilan bog‘liq hodisada halok bo‘ldi. Hozirda rasmiylar tomonidan mazkur avtohalokat sabablari o‘rganilmoqda. Iyul avvalida Tesla Model X Pensilvaniyada ag‘darilib ketdi, bu voqeada hech kim jabrlanmadi. Montana shtatida 10-iyul, yakshanbaga o‘tar kechasi sodir bo‘lgan uchinchi avtohalokatda ham haydovchi va yo‘lovchi omon qoldi. Kompaniya mazkur hodisa chog‘i avtopilot ishlaganini tan olsa-da, undan noto‘g‘ri foydalanilganini da’vo qilmoqda. 
“Bizdagi ma’lumotlorga ko‘ra, haydovchi qo‘li rul chambaragida bo‘lmagan va rul g‘ildiragiga hech qanday bosim o‘tkazilmagan. Bu esa murakkab sharoitlarda haydovchi chambarakni tutib turishi lozimligini nazarda tutuvchi tizimdan foydalanish qoidalariga zid hisoblanadi”, — deb izoh berdi kompaniya vakili. Undan tashqari, avtopilot tizimi ajratuvchi chiziqlar bo‘lmagan qishloq yo‘llari uchun moslashmagan.
Uchinchi mashina haydovchisi — Pan ismli xitoylik politsiyaga boshqaruv tizimi ogohlantirishlarini eshitgani, biroq ingliz tilini bilmagani uchun ularni tushunmaganini ma’lum qildi.
Batafsil | Подробно | Read more... Daryo