Pentagon: AQSh rahbarligidagi koalitsiya IShIDga qarshi operatsiyalarini qayta boshladi

AQSh rahbarligidagi terrorchilikka qarshi xalqaro koalitsiya 17-iyul, yakshanba kuni Turkiyaning Injirlik aviabazasidan operatsiyalar o‘tkazishni qayta boshladi, deb yozadi “TASS” Pentagon matbuot kotibi Piter Kukka tayanib.

Foto: “112.ua”

“Turkiyalik ittifoqdoshlarimiz bilan yaqin hamkorlikdan so‘ng, IShIDga qarshi koalitsiyaning Turkiya hududidan olib boriladigan havo operatsiyalari yangilandi”, — deya ta’kidladi u.
Qayd etilishicha, Amerikaning Injirlik bazasidagi obyektlari hamon ichki elektr ta’minot manbalari orqali ishlamoqda. “Biz elektr ta’minotni eng qisqa muddatlarda qayta tiklashni mo‘ljallamoqdamiz. Bu baza faoliyatiga hech qanday ta’sir o‘tkazgani yo‘q”, — dedi Kuk.
Avvalroq Turkiya janubida joylashgan Injirlik harbiy bazasi qo‘mondoni davlat to‘ntarishiga aloqadorlikda ayblanib qo‘lga olingani xabar berildi . Ayrim OAV Injirlik bazasi to‘ntarishga urinishdan so‘ng yopilgani, shuningdek, tashqi elektr ta’minotidan uzilganini bildirgandi. Ushbu bazada Suriyadagi terrorchilar marralariga zarbalar uchun foydalaniladigan AQSh, Buyuk Britaniya, Germaniya, Saudiya Arabistoni va Qatar aviatsiyasi joylashtirilgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Batafsil | Подробно | Read more... Daryo