OAV: Terrorchilikka aloqador 4 kishi Rio–2016 Olimpiadasiga borish uchun harakat qilgan

Terrorchilikka aloqadar bo‘lgan to‘rt kishi avgust oyida bo‘lib o‘tadigan Rio–2016 Olimpiada o‘yinlariga borish uchun harakat qilgan. Bu haqda Globo telekanaliga tayanib, “TASS” xabar bermoqda .

Foto: Getty Images

Telekanal ushbu xabarni Olimpiada o‘yinlari arafasida Braziliya tomonidan tashkil etilgan hamda AQSh, Buyuk Britaniya, Fransiya, Ispaniya, Belgiya, Argentina va Paragvay rasmiylari ishtirokidagi Birlashgan aksilterror markazidan olingan xabarlarga tayanib ma’lum qilgan. Markaz mutaxassislari Rio–2016 o‘yinlari uchun akkreditatsiya so‘ragan 460 ming kishidan 40 nafari o‘z mamlakatining maxsus xizmati tomonidan “xavfli ro‘yxat”dan joy olganini, shulardan 4 nafari terrorchilikka aloqador ekanini aniqladi.
Ushbu kishilarning ism-sharifi va ularga qarshi qo‘yilgan ayblovlar nomi oshkor etilmayapti. Ularning barchasiga Olimpiada akkreditatsiyasini berish rad etildi, faoliyati esa maxsus nazorat ostiga olindi.
Braziliya mudofaa vaziri Raul Jungmann Fransiyaning Nitssa shahrida bo‘lib o‘tgan teraktdan so‘ng Olimpiada o‘yinlari davomida xavfsizlikni ta’minlash bo‘yicha chora-tadbirlarni kuchaytirishini ma’lum qilgandi.
Eslatib o‘tamiz, Rio–2016 Olimpiada o‘yinlari 5–21-avgust kunlari bo‘lib o‘tadi.
Batafsil | Подробно | Read more... Daryo