Futzal bo‘yicha JCh—2016 ishtirokchilari. Panama: O‘yinchilaridan ko‘ra murabbiyi kuchli jamoa

“Daryo” internet-nashri shu yilning 10-sentabr — 1-oktabr kunlari Kolumbiyada bo‘lib o‘tadigan futzal bo‘yicha jahon chempionati ishtirokchilarini navbatma-navbat tanishtirib bormoqda. Bungacha mezbonlar hamda Portugaliya terma jamoalari haqida ma’lumot berilgan edi, bugun esa O‘zbekistonning musobaqa guruh bosqichidagi yana bir raqibi — Panama haqida.

Foto: Getty

Qanday qilib JCh—2016 ishtirokchisiga aylangan?
2016-yilning may oyida Kosta-Rikada futzal bo‘yicha Shimoliy Amerika (KONKAKAF) chempionati — Kolumbiyada bo‘ladigan jahon chempionatining saralash bahslari bo‘lib o‘tdi. Sakkiz jamoa ishtirok etgan musobaqaning ikki guruhdan iborat guruh bosqichi yakuniga yetishi bilanoq JCh—2016 ishtirokchilari ma’lum bo‘ldi: Gvatemalani 4:1, Gondurasni 10:3, Meksikani esa 4:3 hisobida mag‘lub etgan panamaliklar o‘z tarixida ikkinchi marta jahon chempionati ishtirokchisiga aylandi.
Qayd etish joiz, Panama musobaqadan musobaqaga KONKAKAF chempionatidagi natijalarini yaxshilab bormoqda. 2004-yilgi mintaqaviy musobaqada 5-o‘rinni egallagan panamaliklar, 2008-yili to‘rtinchi, 2012-yili uchinchi va nihoyat, 2016-yilgi birinchilikda ikkinchi o‘rinni egalladi. So‘nggi chempionatda Avgustin Kampuzano shogirdlari yarim finalda Kubani qo‘shimcha vaqtlarda 6:5 hisobida mag‘lub etgan bo‘lsa-da, finalda musobaqa mezboni Kosta-Rikaga yirik — 0:4 hisobida taslim bo‘ldi.
Kuchli tomonlari
Panama futzalining xalqaro maydonlardagi muvaffaqiyatli ishtiroki, avvalo, terma jamoa bosh murabbiyi Avgustin Kampuzano nomi bilan bog‘liq. Kuba futzal terma jamoasi murabbiylari shtabi tarkibida Ispaniyada o‘tgan 1996-yilgi, Gvatemalada tashkil etilgan 2000-yilgi va Xitoy Taypeyi mezbonlik qilgan 2004-yilgi jahon chempionatlarida qatnashgan murabbiyning bosh murabbiy etib tayinlanishi Panama futzal termasini butunlay o‘zgartirib yubordi.

Foto: FIFA

To‘rt yil avval Panama terma jamoasini ilk bor jahon chempionati sari yetaklab borib, Klaudio Gudrij va Fernando Mena kabi o‘yinchilarni haqiqiy qahramon va yulduzga aylantirgan murabbiy bu safar yanada yaxshiroq natijalarga erishishdan umidvor. So‘nggi KONKAKAF chempionatida musobaqaning eng yaxshi darvozaboni deya tan olingan Daniel Atensio esa hozirgi Panamaning eng kuchli nuqtasi hisoblanadi.
Jahon chempionatlaridagi ishtiroki haqida
Panama, yuqorida ta’kidlanganidek, jahon chempionatlaridagi debyutini bundan to‘rt yil avval Tailand zallarida o‘tkazgan va Kolumbiyadagi mundial ular uchun ikkinchi jahon chempionati hisoblanadi.
Umuman olganda, Kampuzano shogirdlari Tailandda yomon natija qayd etmagan, hatto omadli ishtirok etgan, deyish mumkin. Musobaqa guruh bosqichi 1-turida Marokashni 8:3 hisobida mag‘lub etgan debyutantlarning Yevropa giganti Ispaniya (3:8), Osiyo grandi Eronga (3:4) qarshi biror chora topa olishi, albatta, amri mahol edi.

Foto: Getty

Nimchorak finalda esa Braziliya raqib bo‘lgan — nafaqat o‘zining, balki Ozarbayjon, Qozog‘iston va Rossiya kabi milliy terma jamoalarni ham o‘yinchilar bilan ta’minlab berayotgan va oxir-oqibat 2012-yilgi jahon chempioniga aylangan yurt vakillari Panamaga “atigi” 16 ta gol urganiga hayron qolmasa ham bo‘ladi.
2016-yilgi jahon chempionatini Panama aynan O‘zbekistonga qarshi o‘yin bilan boshlaydi. Uchrashuv 10-sentabr kuni Kali shahridagi “Xalq kolizeyi”da bo‘lib o‘tadi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo