Urugvay politsiyasi Olimpiada oldidan Braziliya bilan chegarada maxsus operatsiya o‘tkazmoqda

Urugvay huquq-tartibot xodimlari jinoyatlarning oldini olish maqsadida Rio–2016 o‘yinlari oldidan Braziliya bilan chegarada maxsus operatsiya o‘tkazmoqda. Bu haqda mamlakat politsiya xizmati boshlig‘i Mario Layera 22-iyul, juma kuni ma’lum qildi, deb xabar bermoqda “TASS”.

Foto: AFP / Getty Images

“‘Lochin II’ operatsiyasi payshanba kuni boshlandi. U hech qanday terrorchilik yoki jinoiy guruhga qarshi reaksiya emas”, – deb ma’lum qildi Mario Layera. Braziliya bilan chegaraga 400 nafar politsiyachi yo‘naltirildi. Huquq-tartibot vakillari qurol-yarog‘, qalbaki hujjatlar va xavfli buyumlarni izlab, ularning qo‘shni davlatga chiqib ketmasligining oldini oladi.
Politsiya xizmati boshlig‘i Braziliya hukumati ushbu operatsiyaning amalga oshirilishi haqida xabardor qilinganini ta’kidladi. Maxsus operatsiya Olimpiada o‘yinlari yakuniga qadar davom etadi.
Ma’lumot uchun, Rio–2016 Olimpiada o‘yinlari 5–21-avgust kunlari, Paralimpiya o‘yinlari esa 7–18-sentabr kunlari bo‘lib o‘tadi.
Batafsil | Подробно | Read more... Daryo