Toza sportchilar Olimpiada o‘yinlaridan chetlatilsa, Arsen Fadzayev 2 ta oltin medalidan voz kechishini bildirdi

Doping mash-mashasidan holi bo‘lgan rossiyalik toza sportchilar Rio-de-Janeyro Olimpiadasiga qo‘yilmasa, erkin kurash bo‘yicha sobiq sportchi, 1988 va 1992-yilgi olimpiya o‘yinlari g‘olibi, Rossiya Kurash Federatsiyasining birinchi vitse-prezidenti Arsen Fadzayev Olimpiadadan olgan ikkita oltin medalini Xalqaro Olimpiya Qo‘mitasiga qaytarib beradi.

Foto: Gztslovo.ru

“TASS” xabariga ko‘ra , Fadzayev bu haqda Xalqaro Olimpiya Qo‘mitasi prezidenti Tomas Bax bilan ochiq muloqot vaqtida aytib o‘tgan.
“Sizni xabardor qilib qo‘ymoqchiman, agarda aql bilan ish yuritilmasa men sizga Olimpiada o‘yinlarida qo‘lga kiritganim 2 ta oltin medalni qaytarib beraman. 1984 yilgi Los-Anjeles Olimpiadasiga bizni aynan siyosatchilar sabab qo‘yishmagandi. Agar mening yosh shogirdlarim halol kurash orqali Olimpiada o‘yinlari chempioniga aylanish huquqidan mahrum etilsa, men o‘zimni olimpiya o‘yinlari chempioni deb atay olmayman”, — deydi Arsen Fadzayev.
“Olimpiada o‘yinlarida toza halol sportchilarning ishtirok etmasligi — musobaqa g‘oyalarining o‘lganini bildiradi. Olimpiada o‘yinlarida ishtirok etish har bir sportchining maqsadi, unda g‘olib chiqish esa ularning orzusi ekanini siz juda yaxshi bilasiz. Tasavvur qiling, sizni sport prinsiplariga zid bo‘lgan qandaydir qarorlar sabab Olimpiada o‘yinlaridan chetlatishdi, bu sizga qanday ta’sir qilardi? Ishonamanki, bunday paytda siz Xalqaro Olimpiya Qo‘mitasi prezidenti bo‘lishni istamasdingiz”, — deb murojaat qilgan sobiq kurashchi.
Olti karra jahon va 4 karra Yevropa chempioni bo‘lgan Arsen Fadzayev Xalqaro Olimpiya Qo‘mitasining doping bilan qo‘lga tushgan sportchilarga qarshi qattiq kurashini qo‘llab-quvvatlashini bildirib, uning kurashchilari bunday illatdan chetda ekanini qistirib o‘tdi.
“Olimpiadada dunyoning eng kuchli sportchilari qatnasha olmas ekan, yaxshisi bunday turnirni o‘tkazmay qo‘ya qolgan ma’qul deb hisoblaganman va shunday bo‘lib qoladi. Vaqti kelib sportchilarning orzusiga bolta urilganiga qanday javob bera olasiz?” — dedi Fadzayev.
“Men bolaligimdan Olimpiada o‘yinlari chempioni bo‘lishni istadim va bu yo‘lda mehnat qildim. 1984-yilga qadar bo‘lgan barcha turnirlarni yutdim, raqiblarimga hech bir jabhada imkoniyatni boy bermadim. Biroq kutilmagan fojea sabab siyosatchilar Olimpiadaga boykot e’lon qildi, ko‘p sportchilar unda ishtirok eta olmadi. Shu tariqa siyosatchilarning jirkanch qo‘llari sabab bir qator sportchilar “sinib” qoldi”, — deb so‘zlariga yakun yasadi Olimpiadaning ikki karra chempioni.
Batafsil | Подробно | Read more... Daryo