Italiyada afsonaviy tergovchini o‘ldirgan to‘rt mafiya a’zosi umrbodga qamaldi

Sitsiliyaning Kaltanissetta shahrida hakamlik sudi “Koza nostra” to‘dasining to‘rt rahbarini afsonaviy tergovchi, mafiyaga qarshi kurashgan Jovanni Falkonening o‘ldirilishida aybdor deb topib, umrbod qamoq jazosiga hukm qildi. Bu haqda Libero Quotidiano xabar bermoqda .

Foto: Libero Quotidiano

Prokuratura ma’lumotlariga qaraganda, mafiyachilardan biri Salvo Madoniya tergovchini yo‘q qilish qarorini qabul qilishda bevosita ishtirok etgan, qolganlari — Jorjo Pitsso, Kozimo Lo Nigro va Lorenso Tinnirello qotillikni texnik tashkillashtirishga javobgar.
Tilga olingan jinoyatchilar boshqa ishlari uchun sudlangan bo‘lib, allaqachon qamoqda o‘tiribdi.
Jovanni Falkone rafiqasi Francheska Morvillo va uch qo‘riqchisi bilan 1992-yil mayida Sitsiliya mafiyasi uyushtirgan terakt oqibatida halok bo‘lgan. Tergovchini aeroportdan Palermoga olib ketayotgan zirhli avtomobil Kapachi shaharchasi yaqinida havoga uchirilgan edi.
Ushbu jinoyat uchun 1997-yilda “Koza nostra” rahbari Toto Riina va yana 11 mafiya otasi qamalgan edi.
Batafsil | Подробно | Read more... Daryo