Yaponiyada jazirama tufayli hafta davomida 8 kishi halok bo‘ldi

Yaponiyada issiq urishi oqibatida so‘nggi hafta davomida 4,1 ming kishi shifoxonaga yotqizildi, shulardan 8 nafari halok bo‘ldi. Bu haqda mamlakat FVV va tez yordam funksiyasini bajaruvchi Yong‘inga qarshi kurash bosh boshqarmasi ma’lum qildi, deb xabar bermoqda “TASS”.

Foto: AFP

Qayd etilishicha, shu yilning aprel oyidan buyon Yaponiyadagi shifoxonalarga jazirama tufayli 25 ming kishi kelib tushgan. Jabrlanganlarning aksariyati – qishloqlarda yashaydigan va ko‘p vaqt mobaynida ochiq havoda ishlaydigan katta yoshdagi odamlardir.
Yaponiyada jazirama iyun oyi o‘rtalarida boshlandi. Yomg‘ir mavsumi yakunlanganiga qaramay, Tokioda vaqti-vaqti bilan momaqaldiroq bo‘lmoqda va issiq havo namlikning oshishi oqibatida kuchaymoqda. Kunduzi havo harorati Selsiy bo‘yicha 35 darajagacha ko‘tarilyapti.
O‘tgan hafta Yaponiyada issiq urishi oqibatida 2 kishi hayotdan ko‘z yumgani haqida xabar qilingandi .
Yaponiyalik shifokorlar odamlarga pana joylarda bo‘lishni, quyoshdan saqlaydigan bosh kiyimlarni kiyib, imkon qadar ko‘proq suyuqlik iste’mol qilishni tavsiya etmoqda.
Batafsil | Подробно | Read more... Daryo