“Yo‘lga oqib chiqqan narsa nima?”. Uzoq kutilgan yomg‘irdan keyin “sut to‘kilgandek” bo‘lib qoladigan Toshkent yo‘llari

Iyul oxirida O‘zbekistonda, xususan, Toshkent shahrida nisbatan salqin va yomg‘irli havo kuzatildi. Aynan shunday yomg‘irli kunlarning birida Facebook’dagi “Voditeli Tashkenta” guruhida fotosavol qoldirildi .

Foto: Facebook / “Voditeli Tashkenta”

“Bu oqib ketgan narsa nima? Yo‘lga chizilgan yangi chiziqlarmi?”, — deb savol qoldirgan muallif, Nukus va Oybek ko‘chalari chorrahasining yuqoridan olingan, yomg‘ir yog‘ayotgan vaqtdagi suratlarini ulashgan. Suratlarda yo‘lga oq rangli narsa oqib chiqqanini ko‘rish mumkin.

Foto: Facebook / “Voditeli Tashkenta”

Ba’zi foydalanuvchilar muallifning savolidagi ta’kidni tasdiqlab, “yangi yo‘l chiziqlari, chizilganidan hech qancha o‘tmay, o‘chib ketishni boshladi”, qabilida fikrlar bildirgan.
Biroq aksariyat ko‘pchilik bu ifloslik va chang aralashmasidan iborat ko‘pik ekanini yozib qoldirgan. Kimdir buni avtomobillarning g‘ildiragi iflosligi bilan izohlagan bo‘lsa, ba’zilar yo‘lning chang ekani sabab shunday bo‘lishini aytgan.
“Uzoq vaqt yog‘ingarchilik bo‘lmay, bir yomg‘ir yog‘sa, yo‘llarda har doim mana shunday ko‘piklar paydo bo‘ladi”, — deb yozadi foydalanuvchilardan biri. “Chang, qum kabi iflosliklar bir joyga yig‘ilib qolib, ularning ustiga kuchli zarb bilan tomchi tushsa, u ko‘pirishni boshlaydi”, — deb qo‘shimcha qilgan “Voditeli Tashkenta”ning boshqa bir a’zosi.
Savol muallifining qayd etishicha, ertasi kuni ertalab yo‘llar yuvilib, ko‘piklardan tozalangan, yangi chizilgan yo‘l chiziqlari esa joyida qolgan — yomg‘ir ularga ta’sir ko‘rsata olmagan.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo