Davlat soliq qo‘mitasi uydagi sartaroshlik faoliyati uchun qanday soliq to‘lovlari to‘lanishini ma’lum qildi

O‘zbekiston Respublikasi Soliq kodeksining 276 va 291-moddalariga asosan tadbirkorlik faoliyatida foydalaniladigan yer uchastkalari uchun yoxud uylar, dala hovli imoratlari, yakka tartibdagi garajlar va boshqa imoratlar, inshootlar, joylar yuridik shaxsga yoki yakka tartibdagi tadbirkorga ijaraga berilganda, shuningdek, jismoniy shaxslarning mulkida bo‘lgan, yashash uchun mo‘ljallanmagan joylar va ular egallagan yer uchastkalari uchun jismoniy shaxslardan mol-mulk va yer soliqlari yuridik shaxslardan olinadigan mol-mulk va yer soliqlari uchun belgilangan stavkalar bo‘yicha undiriladi hamda imtiyozlar ularga nisbatan tatbiq etilmaydi. Bu haqda O‘zbekiston Respublikasi Davlat soliq qo‘mitasi matbuot xizmati xabar berdi .

Foto: Deposit photos

Biroq, jismoniy shaxs yer uchastkasi va turar joydan, unda joylashgan uyda istiqomat qilish bilan bir vaqtda tovarlar ishlab chiqarish (ishlar bajarish, xizmatlar ko‘rsatish) uchun foydalangan taqdirda, mol-mulk va yer solig‘i jismoniy shaxslar uchun belgilangan stavka bo‘yicha to‘lanadi.
O‘zbekiston Respublikasi Vazirlar Mahkamasining 2011-yil 7-yanvardagi 6-sonli qarori bilan tasdiqlangan “Xususiy tadbirkorlar yuridik shaxs tashkil etmasdan shug‘ullanishi mumkin bo‘lgan faoliyat turlari ro‘yxati” muvofiq yakka tartibdagi tadbirkorlar sartaroshlik xizmatini ko‘rsatishi mumkin.
Soliq kodeksining 375-moddasiga asosan soliq to‘lovchining kalendar oyida ishlagan kunlari sonidan qat’i nazar, qat’iy belgilangan soliq tadbirkorlik faoliyatining turi va soliq to‘lovchining faoliyatni amalga oshirish joyiga qarab belgilangan stavkalar bo‘yicha to‘lanadi.
Yangi ro‘yxatdan o‘tgan yakka tartibdagi tadbirkor, shu jumladan, oilaviy tadbirkorlik subyekti qat’iy belgilangan soliqni yakka tartibdagi tadbirkor sifatida davlat ro‘yxatidan o‘tkazilgan oydan keyingi oydan boshlab to‘laydi.
Sartaroshlik faoliyatini amalga oshiruvchi yakka tartibdagi tadbirkorlar 2016-yilda oyiga Toshkent shahrida eng kam ish haqining 3,5 baravari, Nukus shahri va viloyat bo‘ysunuvidagi shaharlarda 1,5 baravari, boshqa aholi punktlarida 0,5 baravari miqdorida qat’iy belgilangan soliq to‘laydi.
Batafsil | Подробно | Read more... Daryo