Qozog‘istonda ikki bolaning o‘limiga sabab bo‘lgan tabib ayol ikki yilga qamaldi

Qozog‘istonning Uralsk shahar sudi 81 yoshli tabib ayol Nina Solopovani, u yozib bergan xantal kukuni bilan davolash uslubini qo‘llash oqibatida ikki nafar yosh bola vafot etgani sabab, ikki yilga ozodlikdan mahrum etish haqida hukm chiqardi. Bu haqda “Nur.kz” xabar bermoqda .

Foto: “Kommersant.ru”

Xabar berishlaricha, sud hukmni chiqarishda ayblanuvchining keksa yoshda ekanligini, shuningdek, jabrlanuvchilar tomonidan unga nisbatan hech qanday e’tiroz yoki shikoyatlar yo‘qligini hisobga olgan.
Jinoyat ishi ma’lumotlariga ko‘ra, shaharda “baba Nina” (“Nina xotin”) nomi bilan tanilgan tabib ayol bir onaga bolasini yetti yarim soatga xantal kukuniga o‘rab qo‘yishni, boshqa bir ayolga esa farzandining qorniga 10 kun muddatga xantalli leykoplastirni yopishtirib qo‘yishni tavsiya qilgan. Har ikkala bola keyinchalik kasalxonada vafot etgan.
Hatto saratonni ham davolay olishini da’vo qilayotgan “Nina xotin” bolalarning o‘limida o‘zini aybdor his qilayotgani yo‘q. Uning so‘zlariga ko‘ra, bolalarning onalari uni noto‘g‘ri tushungan va uning ko‘rsatmalariga to‘g‘ri rioya etmagan.
Batafsil | Подробно | Read more... Daryo