Tojikistonda rossiyalik harbiy restorandagi mojaroda o‘ldirildi

Rossiyaning 201-harbiy bazasi xizmatchisi 31-iyulga o‘tar kechasi Tojikistonning Xatlon viloyati, Qo‘rg‘ontepa shahrida o‘ldirib ketildi. Bu haqda Markaziy harbiy okrug qo‘shinlari qo‘mondoni yordamchisi polkovnik Yaroslav Roshchupkin mahalliy OAVlarga ma’lum qildi, deb xabar bermoqda “Interfaks”.

Foto: “Dw.com”

Xabar qilinishicha, dastlabki tekshiruvlardan so‘ng tergov qotillik maishiy xarakterga ega ekanini xulosa qildi. “Og‘ir oqibatlarga olib kelgan mojaro kelib chiqdi. Jinoiy ish bo‘yicha taftish Tojikiston huquq-tartibot organlari hamda Rossiyaning 201-harbiy bazasi hamkorligida olib borilmoqda. Qurbonning Tojikistondagi xizmat muddati, ismi va shaxsiy ma’lumotlari haqidagi ma’lumot keyinroq ommaga taqdim etiladi”, – dedi Roshchupkin.
Mahalliy nashrlar Tojikiston huquq-tartibot organlaridagi manbasiga tayanib, 40 yoshli katta serjant Aleksey Buyenkov o‘ldirilganini ma’lum qildi. Rossiyalik harbiylar va mahalliy aholi o‘rtasida restoranda janjal kelib chiqishi oqibatida harbiy o‘ldirilgan.
201-harbiy baza Rossiyaning mamlakat tashqarisida joylashgan eng yirik harbiy obyekti hisoblanadi. Baza Tojikistonning Dushanbe va Qo‘rg‘ontepa shaharlarida joylashgan.
Batafsil | Подробно | Read more... Daryo