Rossiya Bosh prokuraturasi Total rahbarining samolyoti qulashi ishini Tergov qo‘mitasiga qaytardi

Rossiya Bosh prokuraturasi “Vnukovo” aeroportida yuz bergan va Total korporatsiyasi rahbari Kristof de Marjerining o‘limiga sabab bo‘lgan Falcon samolyoti aviahalokati bo‘yicha ayblov xulosasini tasdiqlashdan bosh tortdi. Bu haqda, Meduza’ning yozishicha , ayblanuvchilardan biri, dispetcher Aleksandr Kruglovning turmush o‘rtog‘i ma’lum qildi, uning so‘zlarini jinoyat ishi bo‘yicha bosh ayblanuvchi — Vladimir Martinenkoning advokati Aleksandr Karabanov tasdiqladi.

Foto: “Kommersant”

“Kommersant” ma’lumotlariga ko‘ra, ayblanuvchilar yaqin vaqt ichida ozodlikka chiqishi mumkin, chunki 21—22-sentabr kunlari ularni hibsda va uy qamog‘ida saqlash muddati yakuniga yetadi. Hibs muddatlarini uzaytirish bo‘yicha majlislar haqida advokatlarga ma’lumot berilmagan.
Bortida ekipajning uch a’zosi va bir yo‘lovchi — Total korporatsiyasi rahbari Kristof de Marjeri bo‘lgan Falcon samolyoti 21-oktabrga o‘tar kechasi “Vnukovo” aeroportidan uchib ketish vaqtida uchish-qo‘nish yo‘lagida qor tozalash mashinasi bilan to‘qnashib, halokatga uchragan, samolyot bortidagi barcha halok bo‘lgan.
Falcon halokati ishi bo‘yicha birinchi bo‘lib qor tozalash mashinasi haydovchisi Vladimir Martinenko hibsga olindi. Tergov qo‘mitasi ma’lumotlariga ko‘ra, u mashinani mast holatda boshqargan. Keyinroq Martinenko o‘z aybini tan oldi.
Keyinchalik aeroportning turli xizmatlaridan bir necha kishi hibsga olindi va uy qamog‘iga joylashtirildi. Hibsga olinganlarning advokatlari va hamkasblari so‘roqlar ko‘plab qoidabuzarliklar bilan amalga oshirilganini bir necha bor ta’kidladi.
O‘z navbatida, Rossiya Tergov qo‘mitasi tergov-surishtiruv ishlari davomida hech qanday qoidabuzarliklar yuz bermagani, tergov sifatli va qisqa muddatda o‘tkazilganini ta’kidlab kelmoqda.
Batafsil | Подробно | Read more... Daryo