“Startap tashabbuslari” dasturi 33 ta startap loyihani ishga tushirishga yordam beradi

8-avgust kuni O‘zbekiston Savdo-sanoat palatasi va BMT Taraqqiyot dasturining “O‘zbekiston biznes forumi (3-bosqich)” Yoshlar startap-tashabbuslarini qo‘llab-quvvatlash dasturi o‘z ishini boshladi. Bu haqda loyiha matbuot xizmati “Daryo”ga ma’lum qildi.

Foto: “O‘zbekiston biznes forumi (3-bosqich)” loyihasi matbuot xizmati

Unda maxsus tanlovning uchta bosqichidan muvaffaqiyatli o‘tgan 33 ta jamoaning yoshlar tomonidan ishlab chiqilgan startap tashabbuslarni qo‘llab-quvvatlashga yo‘naltirilgan uch oylik dasturda ishtirok etishi kutilmoqda.
Dasturga AKT va ma’lumot xavfsizligi, qishloq xo‘jaligi, transport va yo‘l infratuzilmasi, tibbiyot, moliya va to‘lov tizimlari, “aqlli uy”, tekstil va moda, Internet of Things (“Narsalar interneti”), restoran biznesi, ta’lim, huquqshunoslik va boshqa shu kabi sohalarga taalluqli loyihalar kiritildi.
Yosh startap loyihachilarni nihoyatda boy, keng ko‘lamli dastur kutmoqda. Ushbu dastur doirasida “kamchiqim startap” (Lean Startup) uslubiyati, loyihani rivojlantirish borasida maxsus yo‘l xaritasini tuzish, prototip yaratish, dastlabki sotuvlarni tashkil etish kabilar haqida ma’lumot beriladi. Dastur jarayonida ishtirokchilar “trekerlar” (ya’ni, jamoaning rivojlanishini kuzatuvchi va jamoa oldiga qo‘yilgan maqsadlarga erishish masalalari bo‘yicha unga tegishli tavsiyalar beruvchi tajribali ustozlar) bilan maslahatlashishi hamda har haftalik “trekshn-uchrashuvlar”, ya’ni “trekerlar” bilan loyiha rivojlanishi masalalarini muhokama etish uchun tashkil etiladigan yig‘ilishlarda qatnashib, o‘z xatolarini belgilashi, ularni o‘rganib bartaraf etish imkoniga ega bo‘ladi.
Mazkur uch oylik dastur yakunlari asosida loyiha mualliflari o‘z ishlarini Demo Day, ya’ni taqdimot kunida potensial sarmoyadorlarga, investorlarga taqdim etishi kutiladi.
Eslatib o‘tish lozimki, ushbu dasturga tanlov joriy yilning boshida ochiq deb e’lon qilingan edi. Dastur ochilishidan uch oy o‘tar-o‘tmas Toshkent shahri va O‘zbekistonning boshqa viloyatlaridagi 33 ta oliy ta’lim muassasasidan 308 ta ariza qabul qilindi. Dastlabki tanlov natijalari asosida 196 loyiha tanlab olinib, ushbu loyiha mualliflari bilan suhbat o‘tkazildi.
Batafsil | Подробно | Read more... Daryo