Turkiya Rossiyaga Suriyada birgalikda jang qilishni taklif etdi

Turkiya Rossiyani Suriyada IShID jangarilariga qarshi birgalikda harakatlar olib borishga chaqirdi, deb yozadi “Vedomosti”.

Foto: EPA

“Biz barcha tafsilotlarni muhokama qilamiz. Biz Rossiyaga doim IShIDga qarshi qo‘shma harakatlar olib borishni taklif qilib kelganmiz. Taklif kuchda qoladi”, — dedi Turkiya bosh vaziri Mavlud Chavusho‘g‘li. Vazir Rossiyani “IShIDga iloji boricha tezroq barham berish uchun birgalikda kurashish”ga chaqirdi.
Chavusho‘g‘lining fikricha, mamlakatlar o‘rtasidagi yaqin aloqa kelajakda Turkiya harbiy-havo kuchlari tomonidan Su-24 urib tushirilishi kabi inqirozli holatlar oldini oladi. “Suriyada ko‘plab mamlakatlar faoliyat olib bormoqda. Xatolar bo‘lishi mumkin”, — dedi u.
Vazirning so‘zlariga ko‘ra, hamkorlik real vaqtda razvedka ma’lumotlarini ayirboshlash, shuningdek, ikkala mamlakat prezidentlari va harbiylari o‘rtasidagi bevosita aloqalarni ko‘zda tutadi.
O‘tgan yili keskinlashgan Turkiya-Rossiya munosabatlari oxirgi paytlarda yana iliqlashib bormoqda. Jumladan, 9-avgust kuni Erdo‘g‘on Sankt-Peterburgga tashrif buyurib, Vladimir Putin bilan uchrashdi. Keyinroq Putin ushbu uchrashuvni konstruktiv deb baholadi . Erdo‘g‘onning vakili esa Turkiyaning Rossiya bilan iliq munosabatlarining tiklanishi uning NATO bilan muloqotni davom ettirishiga to‘sqinlik qilmasligini aytdi .
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Batafsil | Подробно | Read more... Daryo