Koreya Respublikasi gospitali shifokorlari Farg‘ona vodiysi aholisini chuqurlashtirilgan tibbiy ko‘rikdan o‘tkazdi

“Sog‘lom avlod uchun” fondi bemor va nogiron bolalarni sog‘lomlashtirish maqsadida 2016-yil davomida Germaniyaning Friedensdorf International xalqaro tashkiloti, Koreya Respublikasining Save the Children xalqaro fondi, Koreya xalqaro sog‘liqni saqlash KOFIH fondi, Ewha Womans University, Severance University, In Xa va Bundan Cha universitetlari gospitallari bilan hamkorlikda tug‘ma yurak nuqsoni, terining kuyish asoratlari, tug‘ma qo‘l-oyoq bo‘g‘imlari va boshqa tashxislar bilan og‘rigan o‘zbekistonlik bemor bolalarni bepul sog‘lomlashtirdi. Bu haqda “Sog‘lom avlod uchun” xalqaro xayriya fondi matbuot xizmati xabar berdi .

Foto: O‘zA (Arxiv)

Jumladan, fond uzoq yillardan beri Koreya Respublikasining bir qator xalqaro tashkilotlari va universitetlari bilan hamkorlikda keng ko‘lamda faoliyat olib bormoqda. Fond 2014-yildan boshlab Koreya Respublikasining Ewha Womans University gospitali bilan hamkorlikni yo‘lga qo‘ydi.
Joriy yilning 2—8-avgust kunlari Koreya Respublikasining Ewha Womans University gospitali malakali shifokorlari (27 nafar professor-ortoped, kardiolog, pediatr, otorinolaringolog, gematolog-onkolog, tezkor tibbiyot professori, farmatsevt, tibbiyot hamshiralari, stomatolog-gigiyenist, talabalar va volontyorlar) O‘zbekistonga tashrif buyurdi. Ular 3—6-avgust kunlari Andijon viloyati bolalar ko‘ptarmoqli tibbiyot markazida Farg‘ona vodiysi (Farg‘ona, Andijon va Namangan viloyatlari) aholisini chuqurlashtirilgan tibbiy ko‘rikdan o‘tkazdi va xorijiy professorlar tomonidan Andijon davlat tibbiyot instituti talabalar va magistrlari uchun ortopediya va kardiologiya sohalarida leksiyalar tashkil etildi.
Tibbiy ko‘rikdan o‘tganlarga xorijlik mutaxassislar o‘zlari bilan olib kelgan dori-darmon va sanitariya-gigiyena vositalarini bepul tarqatdi.
Batafsil | Подробно | Read more... Daryo