Futzal bo‘yicha JCh—2016 ishtirokchilari. Ukraina: Yevroning ikki karra vitse-chempioni haqida

Futzal bo‘yicha JCh—2016 ishtirokchilari bilan tanishtirishda davom etamiz. Navbat Ukraina terma jamoasiga.

Foto: FIFA

Ukraina turnirning “D” guruhidan joy olgan bo‘lib, Braziliya, Mozambik, Avstraliya kabi termalarga qarshi kurash olib boradi.
Kolumbiyaga yo‘l
Ukraina terma jamoasining Kolumbiya—2016 chiptasini qo‘lga kiritishi juda ajoyib ketdi. Saralash turnirining birinchi o‘yinida Angliya darvozasi javobsiz 7 bor ishg‘ol qilinganidan keyin, Ukrainani to‘xtatish qiyin ekanini hamma tushunib bo‘ldi.
2-turda ukrain futzalchilari Belgiyani 6:2 hisobi bilan mag‘lub etdi. Garchi 6 ochko cho‘ntakda bo‘lsa-da, bu hali hammasi emasdi. 3-tur ko‘p narsaga oydinlik kiritib berishi kerak edi. Chunki Vengriya terma jamoasi ham Angliyani 5:4, Belgiyani 5:2 hisobida mag‘lub etib, 6 ochkolik bo‘lib olgandi.
Ko‘pchilik kutgan hal qiluvchi o‘yin Ukraina uchun oson bo‘lmadi. Shuningdek, u Vengriyani ko‘proq qiynab qo‘ydi. Yakunda 5:3 hisobida ustun kelgan Ukraina futzal terma jamoasi Kolumbiyadagi Jahon Chempionatida ishtirok etadigan bo‘ldi.
JCh—2016 dagi raqiblari

Foto: FIFA

O‘ziga xos jihatlari
Sariq va ko‘k ranglar jilosi bor liboslarda zalga chiqib keladigan yigitlarga hurmat ko‘zi bilan qarashga majbursiz. Ular saralashdagi 6 ta o‘yinda 29 ta gol urib, 6 tagina gol o‘tkzaib yuborishdi. Bu esa ularning kuchidan darak beradi.
Ukraina terma jamoasi hujumda qanday sifatli o‘yin ko‘rsatsa, himoyalanishda ham shunday harakatlana oladigan kam sonli jamoalar sirasiga kiradi. Futzalchilarining asosiy qismi Lvovning “Energy” hamda Xarkovning “Lokomotiv” klubi sharafini himoya qiladi.
Ukraina terma jamoasi 2001 va 2003-yilgi Yevropa Chempionatlarida kumush medallarni qo‘lga kiritgandi. 2016-yilgi qit’a birinchiligida esa terma chorak finalda Serbiyaga imkoniyatni boy berib qo‘ydi — 1:2. Serbiya ukrainaliklardan har tomonlama ustun emasdi. Shunchaki musobaqa mezboni ekani jamoaga katta yordam berdi.
Mundiallar tarixi

Foto: Focus.ua

Ukraina terma jamoasi Jahon Chempionatidagi ishtirokini 1996-yilda boshlagan bo‘lib, Ispaniya mezbonlik qilgan turnirning yarim finaliga qadar yetib borgan va yakunda 4-o‘rin bilan kifoyalangandi. So‘nggi uchta mundial Ukrainasiz o‘tmagani ham terma kuchidan dalolat beradi.
Sariq-ko‘klar 2012-yil Tailandda bo‘lib o‘tgan Jahon Chempionatida ham yorqin o‘yinlar ko‘rsatishdi. O‘z guruhini 1-o‘rinda yakunlagan Ukraina, nimchorak finalda Yaponiyani taslim qildi. Chorak finalda esa Kolumbiyaga imkoniyat boy berildi.
Braziliya—2008, Xitoy Taypeyi—2004 kabi mundiallarda ham Ukraina guruh bosqichini peshqadam sifatida yakunlagandi. Biroq yurishiga nimchorak finalda yakun yasagan. Shunga qaramay, ukrainlarning Jahon Chempionatida o‘ynash tajribasi katta ekanini unutmaslik kerak.
Batafsil | Подробно | Read more... Daryo