Hasanboy Do‘stmatov: Muhammadqodir Abdullayev kabi chempion bo‘lishni istayman

49 kilogrammgacha bo‘lgan bokschilar o‘rtasidagi turnir chempionligi uchun kolumbiyalik Martinesga qarshi ringga chiqadigan o‘zbekistonlik Hasanboy Do‘stmatov jang oldidan o‘z fikrlari bilan o‘rtoqlashdi, deb xabar berdi “Olamsport”.

Foto: MOQ matbuot xizmati (Anvar Ilyasov surati)

“Uzoq masofadan turib bizni g‘oyibona qo‘llab-quvvatlayotgan muxlislarimizga minnatdorchilik bildiraman”, — deb so‘z boshladi Do‘stmatov. — “Yarim final jangi qiyin kechishini bilardim. Dastlabki ikki raundni yutganimni bilgach, so‘nggi raundda kuchni finalga tejashga harakat qildim va biroz bo‘shashdim”.
Hasanboy Do‘stmatov bo‘lajak raqibining yarim final jangini bevosita arenaning o‘zidan kuzatib borganini tan oldi: — “Men kubalik bokschining g‘alabasini kutgandim. Kolumbiyalik sportchining yutug‘i men uchun kutilmagan bo‘ldi”, — dedi Hasanboy.
“Finaldga kimning raqib bo‘lishi ahamiyatli emas, chunki u kuchsiz sportchi bo‘lmaydi. Yaxshi tomoni, kolumbiyalik bokschi mening jang uslubimga mos ekan. Shundan xursandman. Chiroyli g‘alaba bilan hamyuartlarimni xursand qilish uchun jang qilaman”, — deb ta’kidlagan o‘zbekistonlik charm qo‘lqop ustasi.
Hasanboy Do‘stmatov bundan 16 yil avval Olimpiada chempionligini qo‘lga kiritgan o‘zbekistonlik Muhammadqodir Abdullayevni ham eslab o‘tdi: — “O‘sha oltin medal hozirgacha yagona bo‘lib keldi. Men ham Muhammadqodir aka kabi chempion bo‘lishni istayman. G‘alabam qolgan bokschilarni ruhlantirishini xohlardim”.
Hasanboy Do‘stmatovning kolumbiyalik Martinesga qarshi jangi 14-avgust kuni Toshkent vaqti bilan 22:15 da start oladi.
Batafsil | Подробно | Read more... Daryo