O‘zbekiston kasaba uyushmalari Federatsiyasi Kengashining o‘quv markazida 3-seminar bo‘lib o‘tdi

2016-yilning 9-avgust kuni O‘zbekiston kasaba uyushmalari Federatsiyasi Kengashining o‘quv markazida ish boshlagan 3-seminar yakuniga yetdi. Bu haqda O‘zbekiston kasaba uyushmalari Federatsiyasi matbuot xizmati “Daryo”ga ma’lum qildi.

Foto: “Pictures11.ru”

Xalqaro Mehnat tashkiloti va O‘zbekiston Respublikasi o‘rtasida imzolangan 2014—2016-yillarga mo‘ljallangan Munosib mehnat dasturida ko‘zda tutilgan O‘zbekiston kasaba uyushmalari Federatsiyasi uchun o‘qituvchi-trenerlarni tayyorlash loyihasi doirasida o‘tkazilgan mazkur seminarda ishtirokchilar o‘quv mashg‘ulotlarini zamonaviy va interfaol usulda tashkil qilish sirlarini o‘rgandi.
Shuningdek, seminar ishtirokchilarining o‘quv mashg‘ulotlar tamoyillari, ushbu yo‘nalishda mavjud amaliyot, kichik guruhlarda ishlash usullari va shakllari yuzasidan nazariy va amaliy bilim hamda ko‘nikmalari oshirildi. Tinglovchilar tomonidan tanlab olingan mavzularga oid o‘quv-uslubiy qo‘llanmalarni tayyorlash borasidagi ishlar ham davom ettirildi.
Loyiha Xalqaro Mehnat Tashkilotining Sharqiy Yevropa va Markaziy Osiyo davlatlari uchun Byurosining texnik ko‘magida amalga oshirilayotgan bo‘lib, seminar mashg‘ulotlari Moldova kasaba uyushmalari Konfederatsiyasi Mehnat institutining malakali mutaxassislari D.Suruchanu va V.Choarik tomonidan o‘tkazildi.
Batafsil | Подробно | Read more... Daryo