Amerikalik ekspertlar birinchi yadro zarbasi siyosatidan voz kechilishi mumkin deb hisoblaydi

AQSh o‘z xavfsizligiga zarar yetkazmagan holda birinchi yadro zarbasini berish siyosatidan voz kechishi va o‘z yadro arsenalini taxminan mingta strategik jangovar kallaklargacha qisqartirishi mumkin. Bunday fikrni AQSh Shtab boshliqlari qo‘mitasi raisi sobiq o‘rinbosari, Strategik qo‘mondonlik sobiq qo‘mondoni Jeyms Kartrayt hamda “Minitmen”strategik raketalarini uchirish majmuasi sobiq navbatchi ofitseri Bryus Bler bildirdi, deb yozadi “TASS”.

Foto: “Rusjev.net”

“Sovuq urush tugagach, bizning yadroviy bo‘lmagan qurolni qo‘llash bo‘yicha imkoniyatlarimizda inqilobiy o‘zgarishlar sodir bo‘ldi, yadroviy qurol-yarog‘larni qo‘llash sohasi esa doimiy ravishda qisqarib keldi va shunday darajaga yetdiki, bugungi kunda yadro quroli dushmanlarimiz uni birinchi bo‘lib qo‘llamasligi uchun ularni tiyishdan boshqa maqsadda ishlatilmaydi, — deyiladi ular chop etgan maqolada. — Bizning yadroviy bo‘lmagan qudratimiz, jumladan, iqtisodiy va diplomatik qudratimiz, alyanslarimiz, yadroviy bo‘lmagan qurol-yarog‘larimiz hamda kibermakondagi operatsiya imkoniyatlarimiz, shuningdek, texnologik imkoniyatlarimiz global ko‘lamda ulkan kuch demakdir. Dushmanlarimiz ushbu qurolni birinchi bo‘lib qo‘llashdan tiyilib turar ekan, AQSh o‘z-o‘zini himoya qilish hamda ittifoqdoshlarimizning hayotiy zarur manfaatlarini muhofaza qilish uchun yadroviy qurol-yarog‘ga ehtiyoj ham sezmaydi”.
Maqola mualliflari ta’kidlashicha, “yadro qurolini Rossiya yoki Xitoyga qarshi birinchi bo‘lib qo‘llash bizning va ittifoqdoshlarimizning ham hayotini xavf ostiga qo‘ygan bo‘lardi, chunki bu to‘liq ko‘lamdagi javob ko‘rsatilishiga olib kelardi”.
Ularning fikricha, yadro quroli kimyoviy yoki biologik qurol-yarog‘ga ega mamlakat yoki terrorchilik guruhlariga qarshi ishlatilishi mumkin emas. “Bunday qadam haddan tashqari bo‘lardi, chunki bunday xavflarni daf qilishning muqobil usullari mavjud”, — deyiladi maqolada.
Batafsil | Подробно | Read more... Daryo