O‘zbekistonlik taekvondochi Dmitriy Shokin Turkiyadagi turnirda bronza medali sohibi bo‘ldi

Turkiyaning Samsun shahrida Gran-Pri turkumiga kiruvchi yilning yirik musobaqalaridan biri yakunlandi. Mazkur nufuzli musobaqada 2016-yili Rio-de-Janeyro shahri (Braziliya)da o‘tkaziladigan XXXI yozgi Olimpiada o‘yinlarining yo‘llanmalari uchun reyting ochkolar ham o‘ynaldi, deb xabar beradi O‘zbekiston Milliy olimpiya qo‘mitasi matbuot xizmati.

Foto: O‘zbekiston Milliy olimpiya qo‘mitasi matbuot xizmati

Dunyoning yetakchi taekvondo ustalari ishtirokida bo‘lib o‘tgan musobaqada o‘zbekistonlik Dmitriy Shokin (+87 kg) bronza medaliga sazovor bo‘lib, reyting jadvalidagi mavqeini yanada yaxshilab oldi.
Yuqori vazndagi sportchilar orasida dunyo reytingida birinchi o‘rinni egallab turgan yana bir o‘zbekistonlik taekvondochi Jasur Boyqo‘ziyev ikkinchi davra bahsida koreyalik Chi Jol Xoga 3:4 hisobida imkoniyatni boy berdi. Garchi turnirda sovrinli o‘rinlardan biriga ega bo‘lmagan bo‘lsada, Jasur Boyqo‘ziyev dunyo reytingida hamon peshqadamlik qilmoqda. Dmitriy Shokin ikkinchi o‘rinda borayotgan bo‘lsa, uchinchi o‘rinda ozarbayjonlik R.Isayev bormoqda. Ozarbayjonlik sportchi ham ushbu turnirda birinchi uchrashuvdayoq mag‘lubiyatga uchradi.
Samsun Gran-Prisida ishtirok etgan O‘zbekiston terma jamoasining yana ikki a’zosi aka-uka Maksim va Nikita Rafalovichlar sovrindorlar safidan joy olmadi.
Batafsil | Подробно | Read more... Daryo