“Al-Ayn” ustozi Zlatko Dalich: “Al-Hilol”ni mag‘lub etgani — “Lokomotiv”ning kuchidan darak beradi

Osiyo Chempionlar Ligasi chorak final dastlabki bahsida BAAning “Al-Ayn” jamoasi bugun, 23-avgust kuni o‘z maydonida va Toshkentning “Lokomotiv” klubini qabul qiladi. Uchrashuv oldidan o‘tkazilgan matbuot anjumanida “Al-Ayn” bosh murabbiyi Zlatko Dalich bo‘lajak o‘yin borasida o‘z fikrlarini bildirdi, deb xabar bermoqda O‘zbekiston futbol federatsiyasi matbuot xizmati.

Foto: O‘FF matbuot xizmati

“Osiyo Chempionlar Ligasi biz uchun juda muhim turnir hisoblanadi. Unda g‘alaba qozonishni xohlaymiz. Raqibimiz ‘Lokomotiv’ milliy chempionatida birinchi o‘rinda ketyapti. Ularda kuchli jamoa shakllangan. Jamoani bu o‘yinga tayyorlash oson kechmadi. Avvaliga futbolchilarim 20 kun BAA termasi ixtiyorida bo‘ldi, faqat oxirgi o‘n kundagina biz to‘liq tarkib bilan mashg‘ulot o‘tkaza oldik. Gol o‘tkazmasdan g‘alaba qozonsak xursand bo‘lardim. Buning uchun futbolchilar bor kuch bilan harakat qilishi, muxlislar esa tinmay qo‘llab turishi kerak bo‘ladi. O‘ylaymanki, o‘yin paytida muxlislar bizni yolg‘iz qoldirmaydi
Transfer oynasi davomida braziliyalik Kayo bilan Amir Abdulrahmonni safimizga qo‘shib oldik. Ularning ikkalasi ham kuchli futbolchi va ‘Al-Ayn’ga yordam bera oladi. Raqib tarkibida esa Server Jeparov bor va u juda kuchli futbolchi. ‘Lokomotiv’ avvalgi bosqichda ‘Al-Hilol’ni ortda qoldirdi. Bu ham ularning kuchidan darak beradi. Muammo shundaki, ‘Lokomotiv’ ketma-ket rasmiy o‘yinlarda maydonga tushyapti, bizda esa hali chempionat boshlangani yo‘q. Men ko‘proq shundan xavotirdaman”, – dedi Zlatko Dalich.
Ma’lumot uchun, “Al-Ayn” – “Lokomotiv” uchrashuvi Toshkent vaqti bilan 20:30 da boshlanadi.
Batafsil | Подробно | Read more... Daryo