Toshkent – Buxoro yo‘nalishida “Afrosiyob” tezyurar poyezdining ilk qatnovi amalga oshirildi

Bugun, 25-avgust kuni Toshkent – Buxoro yo‘nalishida yuqori tezlikda harakatlanuvchi zamonaviy “Afrosiyob” elektr poyezdining ilk qatnovi amalga oshirildi. Bu haqda “O‘zbekiston temir yo‘llari” AK axborot xizmati xabar bermoqda .

Foto: “O‘zbekiston temir yo‘llari” AK axborot xizmati

Mazkur yo‘nalishdagi temir yo‘lning uzunligi 259 kilometrdan iborat. Umumiy qiymati qariyb 400 million AQSh dollarini tashkil etuvchi ushbu loyihani amalga oshirish uchun bor-yo‘g‘i 16 oy sarflandi. Loyiha doirasida 16,2 million kubmetr tuproq ishlari, shuningdek, 146 kilometrlik “Maroqand–Navoiy” uchastkasida yer ko‘tarma ishlari bajarilib, yangi temir yo‘l to‘liq yotqizildi.
Navoiydan Buxorogacha bo‘lgan masofada esa mavjud po‘lat izlar to‘liq rekonstruksiya qilindi. Bundan tashqari, ushbu yo‘nalishda jami 222 ta sun’iy inshoot, shu jumladan, 1 ta piyodalar o‘tish yo‘lagi, 4 ta yo‘l o‘tkazgich va 4 ta ko‘prik qurib bitkazildi. Magistralning ikki tomonida deyarli 500 kilometrdan ziyod masofaga metall to‘siqlar o‘rnatildi.
Kattaqo‘rg‘on shahrida bir yo‘la yuz nafar yo‘lovchiga bugungi kun talablari darajasida xizmat ko‘rsatish imkoniyatiga ega bo‘lgan yangi, zamonaviy vokzal binosi qad rostladi. Loyiha doirasida Buxoro vokzali tubdan rekonstruksiya qilindi. Xalqaro standartlarga mos, bir vaqtning o‘zida 300 nafardan ziyod yo‘lovchiga xizmat ko‘rsatishga mo‘ljallangan. Ushbu yo‘nalishda yana 200 dan ortiq yangi ish o‘rinlari yaratiladi.
Yuqori tezlikda harakatlanuvchi “Afrosiyob” elektr poyezdi Toshkentdan Buxorogacha bo‘lgan 600 kilometrlik masofani ilgarigidek 7—8 soatda emas, 3 soatu 20 daqiqada bosib o‘tish imkoniyatiga ega.
Hududda yuqori tezlikda harakatlanuvchi elektr poyezdlari qatnovi yo‘lga qo‘yilgandan so‘ng, mamlakatda bunday poyezdlar harakatlanadigan temir yo‘llar uzunligi 700 kilometrdan ortdi.
Batafsil | Подробно | Read more... Daryo