Bayram tabrigidan: yoshlarimiz mamlakatimizda olib borilayotgan barcha islohotlarning tashabbuskori va ijrochisi bo‘lib maydonga chiqmoqda

Mustaqillikning dastlabki kunlaridan boshlab zamon talabiga javob beradigan yangi avlod kadrlarini tayyorlash vazifasiga alohida e’tibor qaratildi. Bu haqda Prezident Islom Karimovning O‘zbekiston xalqiga mustaqillikning 25 yilligi munosabati bilan yo‘llagan bayram tabrigida aytildi. Tabrik matnini O‘zA taqdim etdi.

Foto: O‘zA

“Biz tanlagan yo‘l — mashhur besh prinsipga asoslangan taraqqiyot strategiyasi naqadar to‘g‘ri ekanini og‘ir sinovlardan o‘tib, mamlakatimiz rivoji uchun mustahkam zamin bo‘lib qolganini hayotimizning o‘zi isbotlab bermoqda. Buning tasdig‘ini mustaqillikka erishganimizning dastlabki kunlaridan boshlab eng o‘tkir va hal qiluvchi masala — zamon talabiga javob beradigan yangi avlod kadrlarini tayyorlash vazifasi misolida yaqqol kuzatish mumkin”, — deb ta’kidladi Islom Karimov.
“Agarki biz 19 yil oldin eski qolip va asoratlardan voz kechib, Kadrlar tayyorlash milliy dasturi va uning uzviy davomi bo‘lgan Maktab ta’limini rivojlantirish umummilliy dasturini qabul qilib, ta’lim-tarbiya tizimini tubdan o‘zgartirmasak, buning uchun davlatimiz va butun jamoatchiligimizning kuch va imkoniyatlarini safarbar etmasak, bugungi ahvolimiz qay darajada bo‘lishini tasavvur qilish qiyin emas, — so‘zida davom etdi davlat rahbari. — Hech ikkilanmasdan aytishga barcha asoslarimiz bor — hozirgi kunda litsey va kollejlarni, oliy o‘quv yurtlarini bitirib chiqayotgan, hayotga yangicha qaraydigan ming-minglab yoshlarimiz biz uchun, kelajagimiz uchun tog‘dek tayanch bo‘lib, mamlakatimizda olib borilayotgan barcha islohotlarning tashabbuskori va ijrochisi bo‘lib maydonga chiqmoqda”.
“Vatanimizning kelajagi va taqdirini o‘z qo‘liga olishga qodir bo‘lgan bunday yangi avlodni tarbiyalashga qaratilgan dasturlarni o‘z vaqtida qabul qilganimiz va davlat siyosati darajasiga ko‘targanimiz yangi jamiyat qurishimizda haqiqatan ham hal qiluvchi rol o‘ynamoqda”, — qo‘shimcha qildi Prezident.
Batafsil | Подробно | Read more... Daryo