Serbiyalik futbolchining oldidagi majburiyatlarini bajarmagani uchun “Sho‘rtan” klubidan 3 ochko olib tashlandi

G‘uzorning “Sho‘rtan” klubi o‘z vaqtida jamoa safida to‘p surgan serbiyalik futbolchi — Urosh Milosavlevich bilan shartnoma majburiyatlarini o‘z vaqtida bajarmagani uchun jazoga tortildi. Bu haqda 4-sentabr, yakshanba O‘zPFL matbuot xizmati xabar bermoqda .

Foto: “Bunyodkor” FK matbuot xizmati

“Sobiq futbolchisi Urosh Milosavlevich bilan shartnoma majburiyatlarini o‘z vaqtida bajarmagani munosabati bilan va FIFA Tartib-intizom qo‘mitasining 2015-yil 9-oktabrdagi qaroridan kelib chiqib, ‘Sho‘rtan’ klubidan 3 ochko olib tashlanadi”, — deyiladi O‘zPFL matbuot xizmati xabarida.
Qayd etishlaricha, “Sho‘rtan”dan 3 ochko olib tashlash haqidagi hujjat, FIFA Tartib-intizom qo‘mitasining 2015-yil 9-oktabrdagi qarori va O‘zbekiston Futbol Federatsiyasining 2016-yil 25-avgustdagi majlisi bayoniga muvofiq, O‘zbekiston Futbol Federatsiyasi Ijroiya qo‘mita byurosi tomonidan qaror qabul qilingan.
“Sho‘rtan” klubi Urosh Milosavlevich bilan imzolagan shartnomasidagi aynan qaysi majburiyatlarini bajarmaganiga aniqlik kiritilmagan.
Futbol bo‘yicha O‘zbekiston Oliy Ligasi 2016-yilgi mavsumida “Sho‘rtan” klubi hozirgacha 20 ta o‘yin o‘tkazib, 7 o‘yinda g‘alaba qozongan, 2 o‘yinda duranga erishgan va 11 uchrashuvda mag‘lub bo‘lgan edi. O‘FF qarori e’lon qilinishidan avval jamoa Oliy Ligada 16 jamoa orasida 23 ochko bilan 9-o‘rinda borayotgan edi.

O‘FF qaroridan avvalgi vaziyat. Skrinshot: “Championat.asia”

Ayni vaqtda O‘zPFL saytidagi Oliy Liga jadvalida “Sho‘rtan”dan 3 ochko olib tashlangani va jamoa 11-o‘ringa tushib qolganini ko‘rish mumkin.

O‘FF qaroridan keyingi vaziyat. Skrinshot: O‘zPFL

Ma’lumot uchun , serbiyalik Urosh Milosavlevich 2011-yilgi mavsum birinchi yarmida “Sho‘rtan” sharafini himoya qilgan. Futbolchi o‘sha yil yozda O‘zbekistonning boshqa bir klubi — “Bunyodkor” a’zosiga aylangan. Hozirda 32 yoshda bo‘lgan Urosh Milosavlevich futbolchilik faoliyatini yakunlagan va  futbol agenti sifatida faoliyat olib boradi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo