Apple kompaniyasi Apple Watch 2 “aqlli” soatini taqdim etdi (foto)

Apple kompaniyasi “aqlli” soatlar ikkinchi avlodini rasman taqdim etdi, deb yozadi “Hi-tech.mail.ru”. Apple Watch 2 dizayni oldingi avlod gadjeti dizaynidan ko‘p ham farq qilmaydi — urg‘u funksional imkoniyatlarni kengaytirishga berildi.

Foto: “Hi-tech.mail.ru”

Soat avvalgidek to‘rtburchak ekranga ega, ammo biroz nafisroq va zamonaviyroq ko‘rinishga keldi. Qurilma po‘lat, to‘q kulrang po‘lat, alyuminiy, to‘q kulrang alyuminiy, tillarang, pushti tillarangda mavjud, shuningdek, sopoldan yasalgan yangi model ham paydo bo‘ldi. Korpus soat ichiga suv kirishidan tamomila himoyalangan, u 50 metrgacha chuqurlikdagi suvdan omon chiqadi.

Foto: “Hi-tech.mail.ru”

Shuningdek, yugurish bilan shug‘ullanadigan sportchilar uchun soatning Apple Watch 2 Nike+maxsus versiyasi chiqariladi.
Apple Watch 2 oldingidek, ikki xil hajmda — 38 va 42 millimetrli ekranlar bilan yetkazib beriladi. Piksellar ham o‘zgarmagan: mos ravishda 272×340 va 312×390 pikselli.

Foto: “Hi-tech.mail.ru”

Apple Watch 2 iPhone’dan ancha mustaqil bo‘ldi. Unga o‘rnatilgan GPS-modul gadjetga mustaqil ravishda va yetarlicha aniqlikda qurilma egasining joylashgan o‘rnini xaritadan topish, bosib o‘tilgan yo‘l va masofani hisoblash imkoniyatini beradi.

Foto: “Hi-tech.mail.ru”

Bundan tashqari, Apple Watch 2 har qanday Wi-Fi tarmog‘iga ulana oladi (avvallari faqat o‘zi biriktirilgan iPhone foydalangan tarmoqlarga ulanardi). Find My Watch funksiyasi Wi-Fi-routerlar signallarini triangulyatsiya qilish orqali qurilmani qidirib topadi.
Ammo Apple Watch 2 orqali qo‘ng‘iroq qilish va qabul qilishni hamon smartfonsiz amalga oshirib bo‘lmaydi.

Yangi “aqlli” soatga sig‘imi kattalashtirilgan akkumulyator o‘rnatildi, mish-mishlarga ko‘ra, u 334 mA/soatga teng (avval — 245 mA/soat). Qurilma yangi, S2 protsessori bilan jihozlandi, u qariyb ikki marta unumliroq. Ichki xotirasi hajmi — 8 Gb.
Apple Watch 2 o‘zi bilan bir vaqtda taqdim etilgan yangi watchOS 3 operatsion tizimida ishlaydi. Klassik Apple Watch 2 AQShda 369 dollar (minimal versiyasi)dan sotiladi. Sotuv 16-sentabrdan boshlanadi.
Batafsil | Подробно | Read more... Daryo