Shaxmat Olimpiadasi. O‘zbekistonlik qizlar Sloveniya termasini mag‘lub etib, 16-o‘ringa ko‘tarildi

Ozarbayjon poytaxti Bokuda davom etayotgan 42-Butunjahon Shaxmat Olimpiadasida 6-tur bellashuvlari bo‘lib o‘tdi, deb yozdi “Olamsport”.

Foto: O‘zbekiston Shaxmat Federatsiyasi

Unda Sloveniya termasi qizlariga qarshi dona surgan o‘zbekistonlik sportchilar 2,5 ga 1,5 hisobida zafar quchgan.
Irina Gevorkyan sloveniyalik raqibasidan yengilgan bo‘lsa, Gulruhbegim Tohirjonova va Sarvinoz Qurbonboyeva zafar quchib, terma jamoaga 1 tadan ochko taqdim etdi. Qolgan yarim ochko Nafisa Mo‘minovaning durangi evaziga qo‘lga kiritildi.
Sloveniya ustidan qozonilgan g‘alaba O‘zbekiston qizlar terma jamoasini 23-o‘rindan 16-pog‘onaga olib chiqdi. O‘ntalikda borayotgan Gruziya O‘zbekiston bilan bir xilda ochko jamg‘argan bo‘lib, qo‘shimcha ko‘rsatkichlarga ko‘ra oldinroq o‘rindan joy olgan.
Bugun — 9-sentabr kuni o‘zbekistonlik qizlar o‘zlari bilan bir xilda ochkosi bor bo‘lgan Germaniyaga qarshi dona suradi. Ortda qolgan 6 ta turning 4 tasida zafar quchgan O‘zbekiston termasi, 1 ta mag‘lubiyat va 1 ta durang qayd etgan.
Batafsil | Подробно | Read more... Daryo