Wells Fargo bankining 5 mingdan ortiq xodimi firibgarlik uchun ishdan bo‘shatildi

AQShning eng yirik banklaridan biri Wells Fargo’ning 5 mingdan ortiq xodimi mijozlarning roziligisiz hisob ochib, ularga xizmat ko‘rsatganlik uchun haq olganligi tufayli ishdan bo‘shatildi. Bu haqda CNN ma’lum qildi, deb yozadi “RIA Novosti”.

Foto: “RIA Novosti”

Ma’lum qilinishicha, jami 2 milliondan ortiq kredit va hisob raqamlarini ochgan 5,3 ming kishi ishdan ozod etilgan. Mijozlar ushbu hisob raqamlar ularning nomiga ochilganligi haqida gumon ham qilmagani holda ularga xizmat ko‘rsatish uchun haq to‘lashga majbur bo‘lgan. Bank xodimlari bonuslar olish va sotuv bo‘yicha rejani bajarish uchun shunday yo‘l tutgan.
Iste’molchilarni himoya qilish federal byurosi 8-sentabr, payshanba kuni bank 185 million dollar miqdoridagi jarimaga tortilishini ma’lum qildi.
Wells Fargo tomonidan yollangan mustaqil konsalting firmasi tekshirishlar davomida mijozlarning roziligisiz paydo bo‘lgan 1,5 million hisob raqam va shu tariqa chiqarilgan 500 mingdan ortiq kredit kartasi mavjudligini aniqladi.
Batafsil | Подробно | Read more... Daryo