MXT: Pokistondan ta’qiblar tufayli 600 minggacha afg‘onistonlik yurtiga qaytishi mumkin

Xalqaro migratsiya tashkiloti (MXT) Pokistonda zo‘ravonlik va ta’qiblarga duch kelayotgan afg‘onistonliklarning ommaviy ravishda vataniga qaytayotganidan xavotir bildirdi. Tashkilot rasmiy vakili Itayi Viririga ko‘ra, Afg‘onistonga yil oxirigacha 600 minggacha kishi qaytishi, bu esa yirik gumanitar inqirozga sabab bo‘lishi mumkin. Bu haqda “TASS” xabar bermoqda .

Foto: Reuters

“Misli ko‘rilmagan miqdordagi afg‘onistonliklar tobora kuchayib borayotgan zo‘ravonlik, asossiz qo‘lga olish, hibsda saqlash va ta’qib etishning boshqa shakllaridan qochmoqda. Ularga ketishi uchun taxminan 48 soat beriladi, shoshilinchda bor-budlarini sotib, uylarini tark etmoqda. Ba’zan Afg‘onistonga kiyim-kechakdan boshqa hech vaqosiz qaytadi. Qish yaqinlashayotganini inobatga olganda, bu insonlar o‘ta mushkul ahvolda”, — ta’kidladi Viriri.
MXTning Afg‘onistondagi missiyasi rahbari Lourens Xartning bildirishicha, tashkilot resurslari yurtiga qaytayotgan afg‘onistonliklarning atigi beshdan bir qismiga yordam berish uchun yetadi. BMT 7-sentabr kuni jahon hamjamiyatiga kelgusi uch oy uchun 150 million dollar ajratishni so‘rab murojaat etdi. Mazkur mablag‘ qaytuvchilarni yotoq va oziq-ovqat bilan ta’minlash, tibbiy yordam ko‘rsatish uchun sarflanadi.
Batafsil | Подробно | Read more... Daryo