Foto: Qozog‘iston prezidenti Nursulton Nazarboyev Samarqandda Islom Karimov qabriga gullar qo‘ydi

Qozog‘iston prezidenti Nursulton Nazarboyev 12-sentabr, dushanba kuni Samarqandda O‘zbekiston Birinchi Prezidenti Islom Karimov qabriga gullar qo‘ydi. Bu haqda Qozog‘iston prezidenti matbuot xizmati xabar bermoqda .

Foto: Qozog‘iston prezidenti matbuot xizmati

Yig‘ilganlarga murojaat qilarkan, Nursulton Nazarboyev uni Islom Karimov bilan ko‘p yillik mustahkam do‘stlik va samimiy munosabatlar bog‘lab turganini ta’kidlab o‘tdi.
“O‘zbekistonning keyingi avlodlari, davlat rahbarlari Islom Karimovni hamisha yodda saqlashlariga ishonchim komil. Uning boy merosi, davlatchilik faoliyati natijalari avlodlar tomonidan o‘rganiladi, qilgan ishlari esa o‘zbek xalqi tarixiga oltin harflar bilan bitiladi. U butun jahonga mashhur yetakchi edi, mamlakatning oyoqqa turishi va iqtisodiyotining o‘sishi, xalq farovonligining oshishi uning nomi bilan bog‘liq. Biz buyuk insonni yo‘qotdik”, — dedi Qozog‘iston prezidenti.

Foto: Qozog‘iston prezidenti matbuot xizmati

Nursulton Nazarboyev birodar O‘zbekiston va Qozog‘iston o‘rtasidagi tarixiy va strategik munosabatlarning mustahkamlanishida O‘zbekiston Birinchi Prezidentining tengsiz o‘rni borligini ham alohida qayd etib o‘tdi.
“Qozoq va o‘zbek xalqlari har doim bir-biriga yelkadosh bo‘lgan. Biz Islom Abdug‘aniyevich bilan 1998-yili Xoja Ahmad Yassaviy maqbarasi oldida abadiy do‘stlik to‘g‘risidagi bitimni imzolaganmiz va bizning munosabatlarimiz har doim shu bitimga asoslangan. Qozog‘iston har doim o‘zbek xalqining yonida bo‘lgan va shunday bo‘lib qoladi”, — deya qo‘shimcha qildi Qozog‘iston prezidenti Nursulton Nazarboyev.
“Nursulton Nazarboyev Islom Karimovning oila a’zolari bilan uchrashdi hamda ularga Qozog‘iston xalqi nomidan va shaxsan o‘z nomidan chuqur hamdardlik izhor qildi”, — deya qo‘shimcha qilinadi Qozog‘iston prezidenti matbuot xizmati xabarida.

Foto: Qozog‘iston prezidenti matbuot xizmati

Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo