O‘zbekistonda “Yoshlarga oid davlat siyosati to‘g‘risida”gi qonun kuchga kirdi

O‘zbekiston Respublikasi Prezidenti vazifasini bajaruvchi Shavkat Mirziyoyev “Yoshlarga oid davlat siyosati to‘g‘risida”gi qonunni imzoladi. Hujjat 15-sentabr kuni matbuotda e’lon qilindi va kuchga kirdi, deya xabar beradi “Gazeta.uz”. 

Foto: O‘zА

Qonunga ko‘ra, yoshlarga oid davlat siyosati deganda davlat tomonidan amalga oshiriladigan va yoshlarning intellektual, ijodiy va boshqa salohiyatini rivojlanishi uchun sharoitlar yaratilishi ko‘zda tutadigan ijtimoiy-iqtisodiy, tashkiliy va huquqiy choralar tushuniladi. Hujjatda “yosh fuqarolar” (14 dan 30 yoshgacha bo‘lgan shaxslar), “yosh oila”, “yosh mutaxassis”, “yoshlar tadbirkorligi” kabi tushunchalarga batafsil to‘xtalib o‘tilgan. 
Qonunda yoshlarga oid davlat siyosatining asosiy tamoyillari tariqasida ochiqlik va shaffoflik, yoshlarning mazkur siyosatni amalga oshirishdagi ishtiroki, yoshlar tashabbuslarini qo‘llab-quvvatlash va rag‘batlantirish, ma’naviy-ma’rifiy va madaniy qadriyatlar ustuvorligi, shuningdek, yoshlarning kamsitilishiga yo‘l qo‘yilmasligi ko‘rsatib o‘tilgan. 
Hujjatda yoshlarning huquq va erkinliklari hamda ijtimoiy himoyasi kafolatlari, qobiliyatli va iste’dodli yoshlar, yoshlar tadbirkorligining davlat tomonidan qo‘llab-quvvatlanishi belgilangan. O‘zbekistonda yoshlar va yosh oilalarni ijtimoiy muhofaza etish maqsadida yoshlar ijtimoiy xizmati tuzilishi ko‘zda tutilgan. 
Batafsil | Подробно | Read more... Daryo