Amudaryoda 422 xonadon OTB krediti hisobiga toza ichimlik suvi bilan ta’minlandi

Amudaryo tumanining (Qoraqalpog‘iston Respublikasi) “Bo‘zyop” ovul fuqarolar yig‘ini hududidagi “Yarimchi” suv taqsimlash stansiyasi qayta rekonstruksiya qilinib, foydalanishga topshirildi. Buning natijasida hududdagi 422 xonadon toza ichimlik suvi bilan uzluksiz ta’minlandi, deya xabar berdi O‘zA.

Foto: EPA

Osiyo taraqqiyot banki tomonidan 1 million 152 ming dollar miqdorida moliyalashtirilgan mazkur loyiha bo‘yicha keng ko‘lamdagi qurilish-ta’mirlash ishlari tumandagi “2-ko‘chma mexanizatsiyalashgan kolonna” mas’uliyati cheklangan jamiyati quruvchilari tomonidan amalga oshirildi.
Aholining ichimlik suvga bo‘lgan talabini qondirishga yo‘naltirilgan ushbu loyihani bajarish o‘tgan yilning aprel oyida boshlangan edi. Qisqa vaqt davomida nasos stansiyasi binosini rekonstruksiya qilish barobarida 21 kilometr uzunlikdagi o‘rta bosimdagi hamda xonadonlarga boradigan 11,7 kilometr uzunlikdagi suv tarmoqlari tortildi. Rekonstruksiya ishlaridan so‘ng suv taqsimlash stansiyasiga zamonaviy nasoslar o‘rnatildi.
Aholini sifatli ichimlik suvi bilan ta’minlashga qaratilgan dastur asosida Xo‘jayli, Kegeyli, Shumanay va Beruniy tumanlarida ham shu kabi suv taqsimlash stansiyalarini rekonstruksiya va ta’mirlash ishlari izchil olib borilmoqda.
Batafsil | Подробно | Read more... Daryo