Reyting: “Istiqlol” san’at saroyidagi kuzning eng qimmat konsert dasturlari

Kuz kelishi bilan, Toshkentdagi “Istiqlol” san’at saroyida ham konsertlar mavsumi ochildi. Jurnalist Feruz Muhammad san’at saroyida bo‘lib, chiptalarning kassadagi narxlari asosida eng qimmat konsertlar reytingini tuzdi.

Foto: “Kun.uz”

10-o‘rin. “Havas” guruhi konserti
23-oktabrda “Havas” guruhining konsert dasturi bo‘lib o‘tadi. Bir kunlik dasturning eng arzon chiptasi 10 ming so‘m, eng qimmati esa — 40 mingdan.
9-o‘rin. “Sizga ta’zim, aziz ustozlar” gala-konserti
Ustoz va murabbiylar kuni munosabati bilan 30-sentabrda tashkil etiladigan gala-konsertning eng arzon chiptasi 10 ming so‘mdan, eng qimmati esa 70 ming so‘mdan sotilmoqda.
7—8-o‘rinlar. “Million” qiziqchilar jamoasi konserti; qiziqchi Avaz Oxun konserti
So‘z ustalarining konsertlari uchun sotilayotgan chiptalarning eng qimmati — 80 ming so‘mdan. 15—18-sentabr kunlari bo‘ladigan “Million” konsertining eng arzon chiptasi 15 ming so‘m, Avaz Oxunning 17—20-noyabrdagi bo‘ladigan tomoshasiga eng arzon kirish chiptasi esa 10 ming so‘m.
6-o‘rin. Xonanda Bahrom Nazarovning konserti
Xonandaning 26—27-noyabr kunlari bo‘ladigan konsertga kirish narxi 8 ming so‘mdan boshlanib, 90 ming so‘mgacha yetadi.
5-o‘rin. Xonanda Ulug‘bek Rahmatullayevning konserti
Ulug‘bek Rahmatullayevning konserti 9—13-noyabr kunlari bo‘lib o‘tadi. Chiptalar narxi — eng arzoni 10 ming so‘m, qimmati — 120 ming.
3—4-o‘rinlar. Xonanda Jahongir Otajonov konserti; xonanda Botir Qodirov konserti
Xonanda Jahongir Otajonovning 28—29-oktabr kunlari bo‘ladigan jonli ijrodagi konserti va xonanda Botir Qodirovning 1—6-noyabr kunlari tashkil etiladigan dasturining chiptalari bir xil narxda sotilmoqda — eng arzon chipta 10 ming so‘m, eng qimmat chipta esa 150 ming so‘m.
2-o‘rin. “Mening Toshkentim” myuzikli
24-sentabr kuni bo‘lib o‘tadigan mazkur musiqiy tomoshaning eng arzon chiptasi 8 ming so‘mdan, eng qimmati esa 180 ming so‘mdan sotilmoqda.
1-o‘rin. Valeriy Meladze
Rossiyalik xonanda Valeriy Meladze faqat bir kun — 1-oktabrda jonli ijroda konsert beradi. Konsertga eng arzon chipta — 100 ming so‘m, eng qimmati esa 1,2 million so‘m.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo