Pentagon Suriya armiyasi marralariga zarba berilganidan afsus bildirdi

Pentagon adashib Suriya armiyasi marralariga havo zarbalari berilganidan afsus bildirdi. Bu haqda AQSh mudofaa vazirligi rasmiy vakili Piter Kuk ma’lum qildi, deb xabar bermoqda “Interfax”.

Foto: “VistaNews.ru”

“Biz hozircha yuz bergan hodisaning barcha tafsilotlarini o‘rganishga harakat qilyapmiz. Agar Suriya armiyasi marralariga adashib zarba bergan bo‘lsak, bundan afsusdamiz, ayniqsa, qurbonlar bo‘lganidan. Koalitsiya samolyotlari Suriya armiyasi emas, IShID marralariga zarba berishni mo‘ljallagandi. Undan tashqari, Rossiya tomoni ogohlantirilgan, biroq bu borada hech qanday xavotir bildirilmagandi. Kerakli saboq chiqarish uchun mazkur operatsiya sinchiklab o‘rganiladi. Ayni paytda, koalitsiya kuchlari IShID to‘liq mag‘lub etilishiga intilishda davom etadi”, —deyiladi Kuk tomonidan tarqatilgan bayonotda.
Eslatib o‘tamiz, AQSh boshchiligidagi koalitsiya samolyotlari 17-sentabr, shanba kuni Dayr-az-Zavr shahri yaqinida Suriya armiyasi marralariga to‘rtta aviazarba bergani, buning oqibatida 62 nafar harbiy xizmatchi halok bo‘lib, yuzga yaqin kishi yaralangani haqida xabar berilgandi .
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Batafsil | Подробно | Read more... Daryo