KXDR oktabrda yangi yadro sinovini o‘tkazishga tayyorlanayotgani ma’lum qilindi

Janubiy koreyalik harbiylar KXDR yadro poligonida yuqori darajadagi faollik kuzatilayotganini qayd etdi. Bu haqda 21-sentabr, chorshanba kuni Janubiy Koreya Milliy mudofaa vazirligining vakili ma’lum qildi, deb yozadi “TASS”.

Foto: “TASS”

“Pxenyan yana bir yadro sinovini o‘tkazishga tayyorgarlik ko‘rayotgan bo‘lishi mumkin”, — deb ta’kidladi vazirlikdagi manba.
Vakilning so‘zlariga qaraganda, KXDRning Xamgyon-Pukto viloyatida joylashgan Pungyori poligonida so‘nggi vaqtlarda harbiy va qurilish texnikalarining faol harakatlanishi kuzatilgan.
“Bundan tashqari, 3-raqamli tunnelga kirish qismida ulkan chalg‘ituvchi chodir tortilgan, bu chodir hududni osmondan ko‘rishni qiyinlashtirmoqda”, — dedi Mudofaa vazirligi vakili.
Uning so‘zlariga qaraganda, aynan shu tunnelda navbatdagi atom sinovi o‘tkazilishi mumkin. Harbiy KXDR yangi yadro sinovini keyingi oyning birinchi o‘n kunligida — har yili 10-oktabr kuni nishonlanadigan Koreya mehnat partiyasi tashkil etilgan kun bayramida amalga oshirishi mumkinligini taxmin qildi.
Pxenyan 9-sentabr kuni o‘z tarixidagi beshinchi va eng kuchli yadroviy sinovni o‘tkazdi . KXDR bungacha 2006, 2009, 2013-yillarda va 2016-yil yanvarida atom bombalarini sinovdan o‘tkazgan, deb hisoblaniladi.
Diqqat, diqqat! “Daryo”ning Telegram’dagi rasmiy kanali — “ Toshqin ‘Daryo’ ”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Batafsil | Подробно | Read more... Daryo