Galaxy Note 7 xarid qilinganidan bir kun o‘tib, egasining qo‘lida portlab ketdi

Yangi partiyaga tegishli Samsung Galaxy Note 7 o‘z egasining qo‘lida portlab ketdi. Bu Xitoyning 25 yoshli fuqarosi Xuey Renji JD.com saytida smartfon xarid qilganidan bir kun o‘tar-o‘tmas sodir bo‘ldi, deb yozadi “RBK”.

Foto: “Belrynok.ru”

Hodisa natijasida yigitning ikkita barmog‘i biroz jarohatlandi. Portlashdan uning MacBook’i ham zarar ko‘rdi.
Voqeadan ko‘p o‘tmay, Xuey Renjining yoniga Samsung kompaniyasi vakili kelib, telefonni qaytarishni so‘radi. Buning evaziga kompaniya smartfonning pulini to‘liq qoplab berishni taklif qildi. Jabrlanuvchi taklifni qabul qilmadi, u kompaniyaga ishonmagani tufayli, portlash sabablarini o‘zi aniqlashga qaror qildi. U bu muammoga jamoatchilik e’tiborini jalb qilmoqchi.
Samsung vakillari ma’lum qilishicha, hozirda ular mijoz bilan muzokaralar olib bormoqda. Kompaniya qurilmani qo‘lga kiritishi bilan, uni “puxtalik bilan tadqiq qilmoqchi”.
Avvalroq Samsung Janubiy Koreyada Galaxy Note 7 smartfonlarini almashtirib bera boshlagani, ammo foydalanuvchilar yangi uskunalarda ham muammolar borligidan shikoyat qilayotgani xabar berilgan edi .
Batafsil | Подробно | Read more... Daryo