Qashqadaryodagi qator kollejlar, maktablar va tibbiyot muassasalari kuz-qish mavsumiga yaxshi tayyorgarlik ko‘rmagani aniqlandi

“O‘zdavenergonazorat” inspeksiyasi Qashqadaryo hududiy bo‘limi viloyatdagi ijtimoiy soha va iqtisodiyot tarmoqlarining kuz-qish davrida barqaror ishlashini ta’minlash yuzasidan o‘rganishlar o‘tkazdi. Bu haqda inspeksiya axborot xizmati xabar bermoqda .

Foto: “O‘zdavenergonazorat” inspeksiyasi matbuot xizmati

O‘zbekiston Prezidentining 2016-yil 10-iyundagi “Respublika iqtisodiyoti tarmoqlarini 2016—2017-yillar kuz-qish davrida barqaror ishlashga tayyorlashni ta’minlash chora-tadbirlari to‘g‘risida”gi qarori ijrosini ta’minlash maqsadida o‘tkazilgan o‘rganishda viloyat prokuraturasi va tegishli nazorat organlari xodimlari ham ishtirok etgan.
Viloyat o‘rta maxsus, kasb-hunar ta’limi boshqarmasiga qarashli G‘uzor qishloq xo‘jalik kasb-hunar kolleji, G‘uzor agrobiznes kasb-hunar kolleji, G‘uzor transport kasb-hunar kolleji, G‘uzor qurilish va kommunal xo‘jaligi kasb-hunar kolleji, G‘uzor neft-gaz kasb-hunar kolleji, Yakkabog‘ tumani qishloq xo‘jalik kasb-hunar kolleji, Yakkabog‘ sanoat va xizmat ko‘rsatish kasb-xunar kolleji, viloyat xalq ta’limi boshqarmasiga qarashli G‘uzor tumanidagi 5-sonli maktab, Yakkabog‘ tumanidagi 83-sonli maktab, Yakkabog‘ tumanidagi 50-sonli maktab, Yakkabog‘ tumani tibbiyot birlashmasiga qarashli obyektlarda qishki mavsumga tayyorgarlik bo‘yicha ishlar sust yo‘lga qo‘yilganligi, energetik qurilmalarni ta’mirlash, gaz tanqisligi kuzatilayotgan hududlarda qozonlarni ko‘mirga moslashtirish, rejalashtirilgan ko‘mir yoqilg‘isini jamg‘arish va saqlanishini ta’minlash bo‘yicha ko‘plab kamchiliklar aniqlandi.
G‘uzor tuman elektr tarmoqlari korxonasi kesimida kuz-qish mavsumiga tayyorgarlik ko‘rish bo‘yicha mavjud elektr tarmoqlari va qurilmalarini mukammal ta’mirlash bo‘yicha reja-tadbirlarni bajarish ishlari kechikayotganligi, jumladan, havo liniyalaridagi mukammal va joriy ta’mir ishlari sust bajarilayotganli, ta’mir ishlari uchun zaxira ehtiyot qismlar yetarli emasligi ma’lum bo‘ldi.
“Tanlov asosida transformator punktlarida bajarilishi rejalashtirilgan ta’mirlash ishlari o‘rganilganda, o‘tgan choraklarda bajarilishi rejalashtirilgan mukammal ta’mirlash ishlari haligacha bajarilmaganligi, o‘tkazilgan ta’mir ishlari sifatsiz bajarilganlari aniqlandi”, — deyiladi inspeksiya axborotida.
Qayd etishlaricha, aniqlangan kamchiliklarni bartaraf etish va ma’sul xodimlarga tegishli chora ko‘rish yuzasidan ma’sul xodimlariga ko‘rsatma xatlar berilgan.
Batafsil | Подробно | Read more... Daryo