Mitsubishi’ning yo‘lovchi samolyoti AQShga sinov parvozini muvaffaqiyatli amalga oshirdi

Mitsubishi kompaniyasining yo‘lovchi tashuvchi reaktiv samolyoti Yaponiyaning Nagoya shahridan AQShning Vashington shtatiga birinchi muvaffaqiyatli sinov parvozini yakunladi. Bungacha havo sovutish tizimidagi nuqsonlar sabab layner parvozi bir necha bor qoldirilgan edi, deya xabar beradi “RBK”. 

Foto: AFP

Havo kemasi Vashington shtatining Grant okrugidagi xalqaro aeroportga qo‘ndi. Parvoz 68 soat davom etdi. Bering dengizidan Alyaskaga uchib o‘tguniga qadar samolyot Yaponiya shimoli va Rossiyada qo‘nishni amalga oshirdi. Amerika qit’asida layner Mozes-Leykda (Vashington shtati) ham qo‘shimcha to‘xtab o‘tdi. 
MRJ mintaqaviy reaktiv samolyoti Yaponiyaning Mitsubishi Heavy Industries korporatsiyasi bo‘linmasi — Mitsubishi Aircraft tomonidan ishlab chiqilgan bo‘lib, so‘nggi 50 yildan ko‘proq vaqt mobaynida Yaponiyada tayyorlangan ilk yo‘lovchi tashuvchi havo kemasi bo‘ldi. 
Samolyotning o‘rtacha uchish masofasi 1,8 mingdan 3,7 ming kilometrgachani tashkil etadi. Taqdimoti o‘tgan yil oktabrida o‘tkazilgan laynerning 78 va 92 yo‘lovchi o‘rniga ega modifikatsiyalari bo‘lib, kompaniya 100 kishiga mo‘ljallangan samolyotlarni ham ishlab chiqarish imkoniyatini ko‘rib chiqmoqda.
Hozirgacha Yaponiya va AQSh kompaniyalaridan 477 ta samolyotga buyurtma olingan. Samolyotlarni 2018-yildan egalariga yetkazib berishni boshlash rejalashtirilgan.
Batafsil | Подробно | Read more... Daryo